BAKI, AzerVoice

İsrail Müdafiə Ordusu, Qəzza zolağının bəzi bölgələrində humanitar məqsədlərlə hərbi əməliyyatlarda gündəlik taktiki pauza tətbiq ediləcəyini açıqlayıb.

AzerVoice xəbər verir ki, bu barədə ordunun mətbuat xidməti bəyanat yayıb.

Bildirirlib ki, bu fasilə Bakı vaxtı ilə hər gün saat 11:00-dan 21:00-a qədər qüvvədə olacaq.

“Siyasi rəhbərliyin göstərişlərinə uyğun olaraq və Qəzza zolağına daxil olan humanitar yardımın həcmini artırmaq məqsədilə İsrail Müdafiə Ordusu bu gündən etibarən (27 iyul - red.) hərbi əməliyyatlarda taktiki pauza elan edir” - deyə, bəyanatda qeyd olunub.

Həmçinin bildirilib ki, bu pauza yalnız İsrail ordusunun əməliyyat aparmadığı bölgələrdə — Əl-Məvasi, Deyr əl-Bəlah və Qəzza şəhərində qüvvədə olacaq və yeni bildirişə qədər davam edəcək.

Qeyd edək ki, 2023-cü il oktyabrın 7-dən etibarən İsrailin həyata keçirdiyi hücumlar, intensiv hava zərbələri və blokada səbəbindən Qəzza zolağında ciddi humanitar böhran yaşanır. BMT və beynəlxalq ictimaiyyətin atəşkəs çağırışlarına baxmayaraq, vəziyyət daha da ağırlaşır.