BAKI, AzerVoice

Şərqi Çin dənizində təhlükəli gərginlik yaşanıb- Çin və Yaponiya qırıcıları arasında toqquşma riski yaranıb.

AzerVoice xəbər verir ki, bu barədə Yaponiya Müdafiə Nazirliyi məlumat yayıb.

Bildirilib ki, Çin qırıcılarının Şərqi Çin dənizində beynəlxalq sular üzərində fəaliyyət göstərən Yapon hərbi təyyarəsinə 30 metr məsafədə iki dəfə yaxınlaşaraq toqquşma riski yaradıb.

Yaponiya Müdafiə Nazirliyindən verilən açıqlamaya görə, çərşənbə günü ilk manevr zamanı Çinin JH-7 qırıcı-bombardmançı təyyarəsi Yaponiya Özünümüdafiə Qüvvələrinə (SDF) aid YS-11EB elektron kəşfiyyat təyyarəsinin 30 metrinə yaxınlaşıb.

Cümə axşamı səhər isə JH-7 eyni təyyarəyə bu dəfə şaquli trayektoriya ilə eyni məsafədən yaxınlaşıb.

Açıqlamada, bu manevrlərin qəza riski yaratdığı vurğulanıb. "Çin hərbi təyyarələrinin bu cür qeyri-adi yanaşmaları potensial toqquşma riski yaradır və ciddi narahatlıqlar yaradır. Bu cür hadisələrin bir daha təkrarlanmamasına çağırırıq."- deyə qeyd olunub.

Qeyd edək ki, daha öncə də İyunun 7 və 8-də Çinin Şandunq təyyarədaşıyan gəmisindən havaya qalxan J-15 qırıcıları Sakit Okean üzərində seyr edən SDF P-3C patrul təyyarəsinin 45 metrinə yaxınlaşaraq təhlükəli manevrlər həyata keçirib. Təhlükəsizliklə bağlı narahatlıqları artıran hadisələrin ardınca Tokio Pekini oxşar hadisələrin təkrarlanmaması üçün çağırıb.