BAKI, AzerVoice

Cənubi Koreyada keçirilən növbədənkənar prezident seçkilərində müxalifətin namizədi Li Jae-myung qalib gəlib.

AzerVoice xəbər verir ki, bu barədə Cənubi Koreyanın Milli Seçki Komissiyası məlumat yayıb.

Demokratik Partiyanın (DP) namizədi Li Jae-myung 49,42 faiz səs toplayaraq prezident seçilib. Onun əsas rəqibi, hakim Xalq Gücü Partiyasından (PPP) Kim Mun Su isə 41,15 faiz səs qazanıb.

Yeni seçilmiş prezident Li Jae-myung impiçment səbəbilə keçirilən seçkilər nəticəsində keçid dövrü olmadan dərhal vəzifəsinin icrasına başlayıb. Prezident səlahiyyətlərini icra edən baş nazirin müavini və təhsil naziri Li Ju-ho ona səlahiyyətləri, o cümlədən silahlı qüvvələrin baş komandanı vəzifəsini təhvil verib. Li Jae-myung bu gün yerli vaxtla saat 11:00-da Milli Assambleyada and içərək prezidentlik vəzifəsinin icrasına rəsmən başlayacaq.

Qeyd edək ki, əvvəlki prezident Yun Suk Yeol 2024-cü il dekabrın 3-də “müxalifətin dövlət əleyhinə fəaliyyətlərdə iştirak etdiyini” əsas gətirərək hərbi vəziyyət elan etmişdi. Lakin bu qərar Assambleya tərəfindən ləğv olunub və Nazirlər Kabinetinin təsdiqi ilə geri götürülüb. Dekabrın 14-də keçirilən səsvermə nəticəsində Yun Suk Yeolun səlahiyyətləri müvəqqəti dayandırılıb. Konstitusiya Məhkəməsi isə 2025-ci il aprelin 4-də impiçmenti təsdiqləyərək onu vəzifədən kənarlaşdırıb. Bu qərarın ardından 60 gün ərzində növbədənkənar seçkilərin keçirilməsi barədə qərar verilmiş və seçki tarixi 3 iyun olaraq müəyyən edilmişdi.