BAKI,VOA, Fərid Mikayılov

Cənubi Koreya hökuməti Yaxın Şərqdə təhlükəsizlik vəziyyətinin pisləşməsi fonunda bölgədə olan vətəndaşlarına ölkələri tərk etmələri ilə bağlı çağırış edib.

VOA xəbər verir ki, Cənubi Koreyanın xarici işlər nazirinin ikinci müavini Kim Cina bildirib ki, Yaxın Şərq ölkələrinin əksəriyyəti mart ayından etibarən üçüncü səviyyəli səyahət xəbərdarlığı altında olduğundan, bölgədə qısamüddətli səfərdə olan vətəndaşlar təxirəsalınmaz səbəbləri olmadığı təqdirdə mümkün qədər tez ərazini tərk etməlidirlər.

Kim Cina qeyd edib ki, yalnız bölgədə qalmaq üçün ciddi əsasları olan şəxslərin səfərlərini davam etdirməsi məqsədəuyğun hesab olunur.

O, eyni zamanda, Yəməndə fəaliyyət göstərən husilərlə Səudiyyə Ərəbistanı arasında son gərginlik fonunda Qırmızı dənizdə fəaliyyət göstərən Cənubi Koreyaya məxsus gəmilərin təhlükəsizliyinin təmin edilməsi üçün maksimum ehtiyatlı davranmağın vacibliyini vurğulayıb.

Rəsmi Seul bölgədəki təhlükəsizlik vəziyyətini yaxından izlədiyini və vətəndaşlarını rəsmi xəbərdarlıqlara əməl etməyə çağırdığını bildirib.