BAKI,VOA,Yusif Şərifzadə

Cənubi Koreya Prezidenti Li Ce Myon ölkəsinin NATO müttəfiqləri ilə müdafiə sənayesi, elmi-tədqiqat, qabaqcıl texnologiyalar və silah sistemlərinin istehsalı sahəsində əməkdaşlığı genişləndirmək istədiyini bildirib.

VOA xəbər verir ki, Li Ce Myon Ankarada keçirilən NATO Zirvə Toplantısının Müdafiə Sənayesi Forumunda çıxışı zamanı Cənubi Koreya ilə NATO arasında mövcud müdafiə əməkdaşlığının daha yüksək mərhələyə keçirilməsini təklif edib. O, bu əməkdaşlığı “Cənubi Koreya-NATO müdafiə sənayesi tərəfdaşlığı 2.0” adlandırıb.

Cənubi Koreya Prezidentinin sözlərinə görə, yeni tərəfdaşlıq yalnız silah mübadiləsini deyil, həm də silah sistemlərinin birgə tədqiqini, istehsalını və istismarını əhatə etməlidir. O bildirib ki, Cənubi Koreyanın sabit istehsal imkanları və sınaqdan çıxmış texnologiyaları NATO-nun uzun illər ərzində formalaşmış təcrübəsi ilə birləşərsə, hər iki tərəfin müdafiə qabiliyyəti əhəmiyyətli dərəcədə güclənəcək.

Li Ce Myon Cənubi Koreyanın NATO üzvləri üçün etibarlı tərəfdaş olduğunu vurğulayıb. Onun sözlərinə görə, müdafiə sənayesi sahəsində daha sıx əməkdaşlıq tərəflərin təhlükəsizlik imkanlarını artırmaqla yanaşı, qabaqcıl texnologiyaların inkişafına da töhfə verəcək.