BAKI,VOA, Nailə Babazadə

Fransa Prezidenti Emmanuel Makron Cənubi Koreyaya rəsmi səfəri çərçivəsində Seuldakı Yonsei Universitetində tələbələr qarşısında çıxış edərək, qlobal siyasətdəki "üçüncü yol" strategiyasını açıqlayıb.

VOA xəbər verir ki, ABŞ və Çini nəzərdə tutan Makron, Fransa və Cənubi Koreya kimi demokratik ölkələrin hər hansı bir gücün vassalına çevrilməməli olduğunu vurğulayıb. O, Avropa, Kanada, Braziliya və Hindistanın daxil olduğu ortaq proqramın müstəqil qərarlar vermək qabiliyyətini gücləndirdiyini bildirib.

Prezident Makron qlobal arenada müstəqilliyin vacibliyinə toxunaraq bildirib: "Biz Çinin dominantlığından asılı olmaq istəmirik, eyni zamanda ABŞ-ın qeyri-müəyyənliyinə məruz qalmaq niyyətində deyilik". O, İkinci Dünya Müharibəsindən sonra qurulan qlobal nizamın hazırda elə həmin nizamı quran başat ölkələr tərəfindən təhlükəyə atıldığını qeyd edib. Makron hər növ hegemonluğa qarşı çıxan və müstəqillik tərəfdarı olan bir koalisiyanın zəruriliyinə inandığını ifadə edib.

Yaxın Şərqdəki gərginliyə də toxunan Fransa lideri, İranla bağlı problemlərin yalnız bombardmanlarla həll edilməsinin qeyri-mümkün olduğunu müdafiə edib. O, bir ölkənin rəhbərliyi bəyənilmədiyi üçün ona hərbi müdaxilə ediləcəyini söyləməyin "Pandora qutusunu açmaq" demək olduğunu vurğulayıb. Makronun fikrincə, bu cür yanaşmalar beynəlxalq hüququn əsaslarını sarsıdır və dünyanı daha böyük xaosa sürükləyir.

Səfər çərçivəsində Makron Cənubi Koreya Prezidenti Li Ce Myunq ilə də bir araya gəlib. Görüş nəticəsində Fransa ilə Cənubi Koreya arasındakı münasibətlər "ümumi strateji tərəfdaşlıq" səviyyəsinə qaldırılıb. Tərəflər xüsusilə müdafiə sənayesi və təhlükəsizlik sahələrində əməkdaşlığı gücləndirmək barədə razılığa gəliblər. Bu addım Avropa və Asiyanın iki güclü demokratiyasının qlobal böhranlar qarşısında birgə hərəkət etmək əzmini nümayiş etdirir.