BAKI,VOA, Fərid Mikayılov

Qətərin dövlət neft-qaz şirkəti QatarEnergy raket zərbələrinin nəticələrinin aradan qaldırılmasının 5 ilə qədər davam edə biləcəyini açıqlayıb.

VOA xəbər verir ki, şirkətin prezidenti və baş icraçı direktoru, eyni zamanda Qətərin energetika naziri Səad əl-Kaabi bildirib ki, hücumlar nəticəsində ölkənin ixrac gücünün təxminən 17 faizi sıradan çıxıb.

Onun sözlərinə görə, bu vəziyyət şirkəti Çin, Cənubi Koreya, İtaliya və Belçikaya mayeləşdirilmiş təbii qaz (LNG) üzrə uzunmüddətli tədarüklərdə fors-major elan etməyə məcbur edə bilər.

“İstehsal obyektlərinə dəyən genişmiqyaslı zərər onların bərpası üçün 5 ilə qədər vaxt tələb edəcək və bizi uzunmüddətli fors-major elan etməyə vadar edəcək”, — deyə nazir vurğulayıb.

Məlumata görə, hücumlar nəticəsində ümumi gücü illik 12,8 milyon ton olan iki LNG istehsal xətti zədələnib. Bu obyektlər ExxonMobil ilə birgə layihələr çərçivəsində fəaliyyət göstərir.

Nazir əlavə edib ki, LNG istehsalının dayanması digər əlaqəli məhsulların ixracına da təsir göstərəcək. Belə ki, kondensat ixracı 24 faiz, mayeləşdirilmiş karbohidrogen qazı 13 faiz, helium 14 faiz, nafta və kükürd isə 6 faiz azala bilər.