BAKI, AzerVoice

HƏMAS ABŞ-ın atəşkəs təklifini yetərsiz sayır.

AzerVoice xəbər verir ki, İsrailin Qəzzaya hücumlarını davam etdirməsinə baxmayaraq, ABŞ vasitəçiliyi ilə təqdim edilən atəşkəs təklifi HƏMAS tərəfindən qəbul edilməyib.

Hərəkat təklifin gözləntiləri qarşılamadığını və mövcud formada qeyri-adekvat olduğunu bildirib.

ABŞ Prezidenti Donald Trampın Yaxın Şərq üzrə xüsusi nümayəndəsi Stiv Vitkoff vasitəsilə irəli sürülən son təklif əsir mübadiləsi və Qəzzada müvəqqəti atəşkəsi nəzərdə tutur. İsrailin baş naziri Benyamin Netanyahunun bu təklifi qəbul edəcəyi açıqlanıb. Ağ Ev isə HƏMAS-ın hələlik cavab vermədiyini və danışıqların davam etdiyini bildirib.

HƏMAS yazılı açıqlamasında, vasitəçilər tərəfindən təqdim edilən planın hazırda təşkilatın aidiyyəti bölmələri tərəfindən məsuliyyətlə araşdırıldığını qeyd edib. Hərəkat əlavə edib ki, verəcəyi cavab Qəzza xalqının maraqlarını qorumağa, humanitar yardımların təmin edilməsinə və daimi atəşkəsin qurulmasına yönələcək.

Qeyd edək ki, İsrailin Qəzzaya hücumları nəticəsində minlərlə mülki şəxs həlak olub və bölgədə humanitar böhran dərinləşib. Bu səbəbdən beynəlxalq ictimaiyyət tərəfləri dayanıqlı atəşkəsə çağırır.