BAKI, AzerVoice
Rusiya və Ukrayna nümayəndə heyətləri bu gün İstanbulda üç ildən sonra ilk dəfə birbaşa sülh danışıqlarına başlayır.
AzerVoice xəbər verir ki, danışıqlar, ABŞ Prezidenti Donald Trampın hər iki tərəfə təzyiq göstərərək münaqişəyə son qoymağa çağırdığı bir vaxtda baş tutur.
Görüş, Boğaziçi sahilində yerləşən Türkiyə Prezident Administrasiyasının Dolmabahçə İş Ofisində keçiriləcək. Türkiyə Xarici İşlər Nazirliyindən verilən məlumata görə, ilk olaraq saat 11:45-də Türkiyə, ABŞ və Ukrayna rəsmiləri arasında üçtərəfli görüş baş tutacaq. Daha sonra isə saat 13:30-da Türkiyə, Rusiya və Ukrayna nümayəndə heyətləri bir araya gələcək.
Sülh danışıqları 2022-ci ilin martından bəri tərəflər arasında keçiriləcək ilk birbaşa təmas olacaq. Rusiya Prezidenti Vladimir Putin Ukrayna Prezidenti Volodimir Zelenskinin birbaşa görüş çağırışını rədd etsə də, danışıqlara orta səviyyəli rəsmilərdən ibarət nümayəndə heyəti göndərib. Ukrayna lideri bu addımı “dekorativ iştirak” adlandıraraq, Putinin müharibəni bitirməkdə səmimi olmadığını bildirib.
Rusiya isə danışıqlara 2022-ci ilin əvvəlində yenə İstanbulda keçirilmiş görüşlərin davamı kimi baxdığını bəyan edib. Lakin həmin vaxt müzakirəyə çıxarılan şərtlər, o cümlədən Ukrayna ordusunun azaldılması tələbi Kiyev üçün olduqca əlverişsiz idi.
Hazırda Rusiyanın Ukrayna ərazisinin təxminən beşdə birinə nəzarət etdiyi bir şəraitdə, Kreml Kiyevdən ərazi güzəştləri, NATO-ya üzvlükdən imtina və neytral status tələblərində israrlıdır. Ukrayna isə bu şərtləri qətiyyətlə rədd edir və ABŞ başda olmaqla beynəlxalq ictimaiyyətdən təhlükəsizlik zəmanəti tələb edir.
Danışıqlarda ABŞ-ı Dövlət Departamentinin Siyasət Planlaşdırması Direktoru Maykl Anton, Rusiya tərəfini isə Kremlin müşaviri Vladimir Medinski, müdafiə və xarici işlər nazirinin müavinləri, eləcə də hərbi kəşfiyyat rəhbəri təmsil edir.
Ukrayna nümayəndə heyətinə müdafiə naziri Rustem Umerov rəhbərlik edəcək. Heyətdə həmçinin Ukrayna kəşfiyyat orqanlarının, Silahlı Qüvvələrin Baş Qərargahının və Xarici İşlər Nazirliyinin yüksək səviyyəli nümayəndələri yer alıb.