BAKI, AzerVoice

Kreml Putinin İstanbuldakı sülh sammitində iştirakına aydınlıq gətirməyib - Qərar son anda veriləcək.

AzerVoice xəbər verir ki, bu həftənin cümə axşamı Türkiyədə keçirilməsi planlaşdırılan Ukrayna-Rusiya sülh sammiti öncəsi Kreml ilk dəfə Rusiya prezidenti Vladimir Putinin iştirakı ilə bağlı rəsmi açıqlama yayıb.

Kremlin sözçüsü Dmitri Peskov bildirib ki, Rusiya danışıqlara hazırlaşmaqdadır, lakin Putin sammitdə şəxsən iştirak edib-etməyəcəyi ilə bağlı qərar sonradan veriləcək.

“Putin danışıqlarda Rusiyanı kimin təmsil edəcəyini uyğun gördüyü zaman açıqlayacaq,” – deyə Peskov jurnalistlərə bildirib. O əlavə edib ki, “hazırda əlavə şərh vermək niyyətində deyilik”.

Məsələ ilə bağlı Ukrayna tərəfinin də açıqlaması gecikməyib. AFP agentliyinə danışan Kiyev mənbələri qeyd edib ki, “Putinin İstanbula gəlməməsi Moskvanın müharibəni bitirmək niyyətində olmadığının son işarəsi olacaq”.

Bu gərgin diplomatik fonda ABŞ prezidenti Donald Tramp da mövqeyini bildirib. Oval Ofisdə keçirdiyi mətbuat konfransında Tramp , “İnanıram ki, Rusiya və Ukrayna liderləri İstanbulda olacaq. Mən də getməyi düşünürəm, ancaq o gün harada olacağımı dəqiq bilmirəm”- deyə bildirib.

Trampın Yaxın Şərq səfəri zamanı Səudiyyə Ərəbistanına çatdığı, kral ailəsinin üzvü tərəfindən qarşılandığı və reaktivlər tərəfindən müşayiət edildiyi də bildirilib.

Digər tərəfdən, Ukrayna prezidenti Volodimir Zelenski sosial şəbəkə platforması X üzərindən etdiyi paylaşımda Trampı Türkiyəyə danışıqlara qatılmağa dəvət edib. Zelenski həmçinin Rusiya artilleriyasının hücumlarının davam etdiyini vurğulayıb.

Qeyd edək ki, Rusiya prezidenti Vladimir Putin mayın 11-də gecə yarısı televiziya vasitəsilə verdiyi bəyanatda Qərbin 30 günlük atəşkəs çağırışından yan keçərək birbaşa və qeyd-şərtsiz danışıqlara hazır olduğunu, yer və tarix təklif etdiyini açıqlamışdı. Həmin bəyanatdan sonra Türkiyə prezidenti Rəcəb Tayyib Ərdoğan həm Putin, həm də Fransa prezidenti Emmanuel Makronla telefonla danışıb.