Bakı, AzerVoice

Qəzzada ABŞ-ın yardım təşkilatının rəhbərlik etdiyi tibbi ləvazimatları daşıyan konvoya İsrail tərəfindən hücum edildi.

AzerVoice xəbər verir ki, Amerika Yaxın Şərq Qaçqınlara Yardım Təşkilatı (Anera) cümə günü verdiyi açıqlamada, İsrailin Qəzza zolağında Birləşmiş Ərəb Əmirliklərinə (BƏƏ) məxsus çöl xəstəxanasına tibbi ləvazimat və yanacaq daşıyan konvoya raket zərbəsi endirdiyini, nəticədə yerli nəqliyyat şirkətindən bir neçəsinin həlak olduğunu bildirib.

İsrail heç bir sübut təqdim etmədən silahlı şəxslərin konvoyu ələ keçirdikdən sonra atəş açdığını iddia edib.

Anera-nın Fələstin direktoru Sandra Rasheed, cümə axşamı Qəzza zolağında Səlahəddin yolunda hərəkət edən maşın karvanındaki ilk avtomobilin vurulduğunu və yardım agentliyinin Rəfahdakı Əmirlik Qızıl Aypara xəstəxanasına ləvazimat gətirmək üçün istifadə etdiyi nəqliyyat şirkətində işləyən bir neçə nəfərin öldüyünü söylədi.

Rasheed açıqlamasında, Anera tərəfindən koordinasiya edilən və İsrailin səlahiyyətli nümayəndələri tərəfindən təsdiq edilən konvoyda bir Anera əməkdaşının da olduğunu və hücumdan xəsarət almadan sağ qaldığını bildirib.

Onu da əlavə edək ki, hücum ABŞ-ın İsrail tərəfindən Birləşmiş Millətlər Təşkilatının (BMT) avtomobillərinə edilən hücumlarını tənqid edərək, BMT və humanitar təşkilatlara qarşı hücum və təhdidlərə son qoymağa çağırdığı bir vaxtda baş verib.

Qeyd edək ki, Birləşmiş Millətlər Təşkilatının Təhlükəsizlik Şurasının Qəzzada humanitar vəziyyətlə bağlı cümə axşamı keçirilən iclasında ABŞ səfirinin müavini Robert Vud bildirib ki, İsrail ordusu BMT-nin Qida Agentliyinin (WFP) dəqiq nişanlanmış avtomobilini dəfələrlə atəşə tutub və bu maşının Qəzzanın mərkəzindəki Vadi körpüsündə İsrail hərbi nəzarət məntəqəsinə doğru irəliləyərkən vurulduğunu əlavə edib. Həmçinin, avtomobilin İsrailin rəsmi nümayəndələrindən icazə aldığı də bildirilib.