Mavritaniyalı diplomat İsmail Vələd Şeyx Əhməd 30 ildən çox müddəti BMT strukturlarında və böhran ocaqlarında keçirdikdən sonra 57 üzv dövləti birləşdirən İslam Əməkdaşlıq Təşkilatının (İƏT) rəhbərliyinə gəlir. O, xarici işlər nazirlərinin cümə axşamı keçirilən səsverməsi ilə səlahiyyət müddəti bu ilin noyabrında başa çatan Çad nümayəndəsi Hüseyn İbrahim Tahanın xələfi seçilib.
1960-cı il təvəllüdlü İsmail Vələd Şeyx Əhməd Fransanın Monpelye Universitetində iqtisadiyyat üzrə bakalavr, Böyük Britaniyanın Mançester Universitetində insan resurslarının inkişafı üzrə magistr dərəcəsi alıb, habelə Niderlandın Maastrixt İdarəetmə Məktəbində iqtisadiyyat və sosial siyasətin təhlili üzrə ali təhsil sertifikatına yiyələnib.
Mavritaniyalı diplomat peşəkar karyerasının böyük hissəsini BMT sistemi daxilində inkişaf, humanitar fəaliyyət və böhranların idarə olunması sahələrinə həsr edib. O, BMT-nin Uşaq Fondunda (UNICEF) Nyu-Yorkda Dəyişikliklərin İdarə Edilməsi Departamentinin direktoru, Şərqi və Cənubi Afrika üzrə regional direktor müavini və təşkilatın Gürcüstandakı nümayəndəsi kimi məsul vəzifələrdə çalışıb.
Lakin onun karyerasının ən parlaq mərhələsi Yaxın Şərqlə bağlıdır. O, 2008–2012-ci illərdə BMT-nin Suriyadakı rezident əlaqələndiricisi, humanitar məsələlər üzrə əlaqələndiricisi və BMT-nin İnkişaf Proqramının (UNDP) nümayəndəsi olub. 2012–2014-cü illərdə Yəməndə analoji BMT missiyalarını icra etdikdən sonra BMT Baş katibinin xüsusi nümayəndəsinin müavini və BMT-nin Liviyaya Dəstək Missiyasının rəhbər müavini təyin edilib.
2015-ci ilin yanvarında səhiyyə böhranının qlobal çağırışa çevrildiyi bir vaxtda BMT-nin Ebola Epidemiyasına Qarşı Fövqəladə Reaksiya Missiyasına rəhbərlik edib. Lakin Yəmən onun siyasi tərcümeyi-halında ən mühüm dayanacaq sayılır. BMT-nin ovaxtkı Baş katibi Pan Gi Mun 25 aprel 2015-ci ildə onu Camal Benomarın yerinə Yəmən üzrə xüsusi elçi təyin edərək Təhlükəsizlik Şurası, Körfəz ölkələri, regional hökumətlər və Yəmən tərəfləri ilə siyasi nizamlanma istiqamətində işləməyi tapşırmışdı.
Vələd Şeyx Əhməd daha sonra 2016-cı ildə Küveytdə Yəmən hökumətini, "Ümumi Xalq Konqresi"ni və husiləri birbaşa təmaslarda bir araya gətirən, hərbi əməliyyatların dayandırılmasını, habelə təhlükəsizlik və siyasi tədbirləri müzakirə edən sülh məsləhətləşmələrinə rəhbərlik etdi. Danışıqlar yekun razılaşma ilə nəticələnməsə də, mavritaniyalı diplomatı regionun ən mürəkkəb münaqişələrindən birinin mərkəzinə gətirdi.
Yəmən missiyasını başa vurduqdan sonra o, ölkəsinin diplomatiyasına qayıdaraq 2018-ci ildən 2022-ci ilin əvvəlinədək Xarici İşlər və Əməkdaşlıq Naziri vəzifəsini icra etdi. Həmin ilin iyun ayında isə Mavritaniya Prezidenti Məhəmməd Vələd Şeyx əl-Qəzvaninin Administrasiya rəhbəri təyin olundu.
Beləliklə, Vələd Şeyx Əhməd humanitar fəaliyyət, beynəlxalq vasitəçilik və dövlət diplomatiyası təcrübəsini özündə birləşdirdi. Bu zəngin təcrübə onu Baş Katibliyin yerləşdiyi Ciddədə fərqli bir missiya qarşısında qoyur. Yəməndə tərəfləri yaxınlaşdırmaq, Suriya və Liviyada BMT çətiri altında işləmək, eləcə də öz ölkəsinin siyasətini təmsil etmək kimi böhranların idarə olunması təcrübəsindən sonra yeni Baş katib vasitəçilikdən 57 üzv dövlət arasında ümumi İslam konsensusu yaratmaq kimi daha geniş sınaqla üz-üzə qalacaq.
Qeyd edək ki, "İslam Əməkdaşlığı" nizamnaməsi Baş katibin rolunu yalnız diplomatik təmsilçiliklə məhdudlaşdırmır; ona İslam sammitlərinin və Xarici İşlər Nazirləri Şurasının qərarlarının icrasına nəzarət etmək, təşkilatın orqanlarının fəaliyyətini əlaqələndirmək, eləcə də onun məqsədlərinə xidmət edə biləcək və ya onlara mane ola biləcək məsələləri qaldırmaq vəzifəsi həvalə olunur.