BAKI, AzerVoice

Fransanın xarici işlər naziri Jan-Noel Baro cümə günü bildirib ki, Parisin Fələstin dövlətini tanıma qərarı HƏMAS-ın mövqeyinə qarşı verilmiş aydın bir mesajdır və bu addım iki dövlətli həllə sadiqliyin göstəricisidir.

AzerVoice xəbər verir ki, Baro bu barədə Xisrai sosial platformasında yazıb.

“HƏMAS iki dövlətli həlli hər zaman rədd edib. Fransa Fələstini tanımaqla bu terror təşkilatının səhv yolda olduğunu bildirir və sülh düşərgəsinin haqlı olduğunu vurğulayır.”

Fransa Prezidenti Emmanuel Makron cümə axşamı elan edib ki, ölkəsi sentyabr ayında BMT-nin Baş Assambleyasında Fələstin dövlətini rəsmi olaraq tanıyacaq.

“Yaxın Şərqdə ədalətli və davamlı sülhə nail olmaq üçün tarixi öhdəliyimizə sadiq qalaraq, Fələstini tanımaq qərarına gəldim”- deyə Makron bildirib.

Əgər bu addım atılarsa, Fransa Fələstin dövlətini tanıyan ilk əsas Qərb dövləti olacaq.

Netanyahudan sərt reaksiya: “Bu, terrorçuluğa mükafatdır”

İsrailin Baş naziri Benyamin Netanyahu Fransa qərarına sərt reaksiya verib. O, bu addımı “terrorçuluğun mükafatlandırılması” və İsrailin varlığına “egzistensial təhdid” kimi qiymətləndirib. Netanyahu bildirib:

“Fələstinlilər İsrailin yanında yox, yerində bir dövlət istəyirlər.”

Netanyahu həmçinin əlavə edib ki, bu tanıma qərarı Qəzza kimi “İranın yeni agentlərinin” formalaşmasına yol aça bilər və bu da İsrailə qarşı təhdid yarada bilər.

HƏMAS: “Addım müsbətdir və tanınma davam etməlidir”

HƏMAS isə Makronun açıqlamasını alqışlayaraq, onu “Fələstin xalqının haqlarının tanınması və öz müqəddəratını təyinetmə hüququna dəstək” kimi qiymətləndirib. Hərəkat, xüsusilə Avropa ölkələrinə, Fransanın ardınca gedərək Fələstini tam şəkildə tanımağa çağırıb.

Bu arada “Bloomberg” agentliyinin yaydığı məlumata görə, Britaniya hökumətində bir neçə nazir Baş nazir Keir Starmerə təzyiq göstərərək, onun da rəsmi tanıma qərarı verməsini istəyirlər.