BAKI, AzerVoice, Nailə Babazadə

Misir Prezidenti Əbdülfəttah əs-Sisi Qəzzada əldə olunmuş və tezliklə qüvvəyə minməsi gözlənilən atəşkəs razılaşmasının bölgə xalqları üçün "ədalət və sabitlik dolu bir gələcək ümidi qapısını araladığını" bildirib.

AzerVoice xəbər verir ki,Sisi yazılı açıqlamasında Şarm əl-Şeyxdə razılaşmaya gəlindiyini xatırladaraq, dünyanın bu anla “sülh iradəsinin zəfərini təcəssüm etdirən tarixi bir hadisəyə” şahidlik etdiyini qeyd edib.

Misir Prezidenti əlavə edib ki, razılaşma yalnız müharibənin sonunu bildirmir, eyni zamanda bölgə xalqları üçün daha ədalətli və sabit bir gələcək üçün ümid yaradır.

Qeyd edək ki, ABŞ Prezidenti Donald Tramp İsraillə HƏMAS-ın Qəzzada atəşkəs planının ilk mərhələsini təsdiqlədiyini açıqlayıb.

Həmas da Qəzza zolağında atəşkəs razılaşmasına gəldiklərini təsdiqləyərək, Türkiyə, Qətər, Misir və ABŞ Prezidenti Trampın səylərini yüksək qiymətləndirdiyini bəyan edib.

İsrail Baş naziri Benyamin Netanyahu isə Misirdə keçirilən danışıqlarda Qəzzada atəşkəs razılaşmasına varıldıqdan sonra kabineti toplayaraq, İsrailli əsirlərin geri qaytarılması üçün atəşkəs razılaşmasını təsdiqləyəcəklərini bildirib.