BAKI,VOA, Nailə Babazadə

İsrail ordusu şənbə günü səhər saatlarında Beyruta yeni hücum dalğası başladaraq İran tərəfindən dəstəklənən "Hizbullah" qruplaşmasını hədəf aldığını bəyan edib. Livanın dövlət mediası isə ölkənin cənubunda da intensiv zərbələrin endirildiyini xəbər verir.

VOA xəbər verir ki, Livan martın 2-də "Hizbullah"ın İranın ali rəhbəri Əli Xameneyinin öldürülməsinin qisasını almaq məqsədilə İsrailə raketlər atmasından sonra Yaxın Şərq müharibəsinə sürüklənib. İsrail ordusu həmin tarixdən etibarən Livanın müxtəlif bölgələrinə zərbələr endirir və ölkənin cənubuna quru qoşunları yeridib. Şənbə günü verilən qısa bəyanatda İsrail qüvvələrinin hazırda Beyrutda "Hizbullah" terror təşkilatının hədəflərini vurduğu bildirilib.

Livanın rəsmi Milli Xəbər Agentliyi (NNA) Beyrutun cənub məhəllələrinə zərbələr endirildiyini, ölkənin cənubundakı Qanduriyə qəsəbəsində isə bir evin vurulması nəticəsində azı bir nəfərin öldüyünü, iki nəfərin yaralandığını xəbər verib. Eyni zamanda "Hizbullah" döyüşçülərinin Livanın cənubundakı altı kənddə İsrail hərbçilərini hədəf aldığı və sərhədi keçərək raket zərbələri endirdiyi bildirilir.

ABŞ-ın Livandakı səfiri Mişel İssa Livan Prezidenti Jozef Aunun atəşkəs təşəbbüsünü dəstəklədiyini bildirsə də, İsrailin hələlik hücumları dayandırmaq niyyətində olmadığını qeyd edib. Livan Səhiyyə Nazirliyinin məlumatına görə, müharibə nəticəsində ölkədə 1000-dən çox insan həlak olub, bir milyondan çox insan isə didərgin düşüb.