BAKI,VOA, Fərid Mikayılov

Nəvaf Salam ABŞ-nin vasitəçiliyi ilə İsraillə əldə olunan çərçivə razılaşmasının uzunmüddətli nizamlanmaya yönəlmiş danışıqların əsasını təşkil etdiyini, lakin bunun sülh müqaviləsi olmadığını bildirib.

VOA xəbər verir ki, Salam qeyd edib ki, "çərçivə razılaşması" ifadəsi bəzən yanlış anlaşılır.

"Biz danışıqların istiqamətini müəyyənləşdirən və yekunda razılaşmaya nail olmağı hədəfləyən rəhbər çərçivədən danışırıq. Bu, sülh müqaviləsi deyil", – deyə Baş nazir vurğulayıb.

Onun sözlərinə görə, Livan İsraillə danışıqlara həvəs göstərən tərəf deyil, lakin minlərlə insanın həyatına son qoyan iki müharibədən sonra yaranmış vəziyyət bu mərhələyə gətirib çıxarıb.

Xatırladaq ki, İsrail və Livan ötən cümə günü ABŞ-nin dəstəyi ilə iki ölkə arasında sülh danışıqlarına zəmin yaratmaq məqsədi daşıyan çərçivə sənədini imzalayıblar.

Bununla yanaşı, Hizbullah sözügedən razılaşmanı tanımadığını açıqlayıb və silahı təhvil vermək və ya təşkilatı ləğv etmək niyyətində olmadığını bəyan edib.