BAKI,VOA,Yusif Şərifzadə
Yaxın Şərqdə gərginliyin azalması istiqamətində diplomatik səylərin güclənməsi ilə bəzi hava yolları şirkətləri bölgəyə uçuşları mərhələli şəkildə bərpa etməyə başlayıb. Bununla yanaşı, bir çox şirkət təhlükəsizlik səbəbindən bəzi marşrutlar üzrə məhdudiyyətləri qüvvədə saxlayır.
VOA xəbər verir ki, ABŞ-nin "Delta" hava yolu şirkəti Atlanta–Təl-Əviv marşrutu üzrə uçuşları dekabrın 18-dək dayandırıb. Şirkət Nyu-York–Təl-Əviv reyslərini sentyabrın 6-dan bərpa etməyi planlaşdırır. Boston–Təl-Əviv marşrutunun açılışı isə növbəti qəraradək təxirə salınıb.
Fransanın "Air France" hava yolu şirkəti Təl-Əvivə uçuşları iyulun 2-dək, Dubaya uçuşları iyulun 5-dək, Beyruta uçuşları isə iyulun 9-dək dayandırıb. Şirkətin Niderlanddakı tərəfdaşı "KLM" isə Ər-Riyad, Dəmmam və Dubaya reysləri avqustun 23-dək həyata keçirməyəcəyini açıqlayıb.
Almaniyanın "Lufthansa" və İtaliyanın "ITA Airways" hava yolu şirkətləri iyulun 1-dən Təl-Əvivə uçuşları bərpa edib. Bununla yanaşı, İsveçrənin "SWISS" hava yolu şirkəti uçuşların bərpasını avqust ayına qədər təxirə salıb. "Brussels Airlines" isə Təl-Əvivə reysləri oktyabrın 24-dək dayandırıb.
"Lufthansa" və "SWISS" Dubaya uçuşları sentyabrın 13-dək həyata keçirməyəcək. Bundan başqa, "Lufthansa", "SWISS", "Austrian Airlines" və "Brussels Airlines" Əbu-Dabi, Əmman, Beyrut, Dəmmam, Ər-Riyad, Ərbil, Müsqət və Tehrana uçuşları oktyabrın 24-dək dayandırıb.
Kanadanın "Air Canada" hava yolu şirkəti də Təl-Əviv və Dubaya uçuşların oktyabrın 24-dək ləğv olunduğunu açıqlayıb.