BAKI,VOA
İranın Körfəz ölkələrinə hücumlarının fəsadları davam edir. Belə ki, Tehranın raket və pilotsuz uçuş aparatlarından (PUA) istifadə etməsi nəticəsində bir neçə ərəb ölkəsində xəsarət alanlar və maddi itkilər qeydə alınıb.
VOA xəbər verir ki, Qətərin Daxili İşlər Nazirliyi təhlükə səviyyəsinin yüksək olduğunu elan edib, eyni zamanda Doha səmasında hava hücumundan müdafiə sistemlərinin səsləri eşidilib.
Səudiyyə Ərəbistanı və Küveyt bazar günü axşam saatlarında İran raketlərinin qarşısını aldıqlarını açıqlayıb. Bəhreyn də ABŞ və İsrailin İrana qarşı müharibəsinə cavab olaraq həyata keçirilən bu hücumlar fonunda həyəcan siqnallarını işə salıb.
Səudiyyə Ərəbistanının Müdafiə Nazirliyi bəyanatında paytaxt Ər-Riyaddan cənub-şərqdə, Əl-Xərc əyalətində yerləşən Şahzadə Sultan aviabazasına doğru atılan iki ballistik raketi zərərsizləşdirdiyini və məhv etdiyini bildirib.
Daha sonra Nazirlik bazar ertəsi səhər saatlarında Rüb əl-Xali səhrasında Şeybə yatağına doğru hərəkət edən bir PUA-nın zərərsizləşdirilərək məhv edildiyini açıqlayıb.
Mülki obyektlər
Öz növbəsində, Küveytin Müdafiə Nazirliyi bazar ertəsi səhər erkən saatlarda hava hücumundan müdafiə qüvvələrinin düşmənin raket və PUA hücumlarının qarşısını aldığını bildirib.
Bundan əvvəl Əs-Səbiyyə elektrik stansiyasında yanacaq çənlərinin birində və su şirinləşdirmə qurğularında kiçikmiqyaslı yanğın baş verib. Elektrik və Su Nazirliyi təhlükəsizlik qruplarının dərhal yanğına müdaxilə etdiyini və heç bir insan itkisi olmadan onun nəzarətə alındığını açıqlayıb.
Digər tərəfdən, ABŞ Mərkəzi Komandanlığı martın 6-da Küveytdə ABŞ Milli Qvardiyasının bir əsgərinin qəfil yaranan səhiyyə problemi səbəbindən vəfat etdiyini bildirib və ölümün səbəbini müəyyənləşdirmək üçün araşdırma aparıldığını vurğulayıb.
Bəhreynin Daxili İşlər Nazirliyi İranın PUA hücumu nəticəsində Sitrə bölgəsində vətəndaşlar arasında yaralananların (onlardan birinin vəziyyəti ağırdır) olduğunu, həmçinin evlər kimi bəzi mülki obyektlərə ziyan dəydiyini elan edib.
Frans Press (AFP) agentliyinin jurnalistləri iki güclü partlayışın baş verdiyini bildirsə də, Daxili İşlər Nazirliyinin məlumatına görə, bazar günü İran PUA-larının Bəhreynin Sitrə adasına hücumu nəticəsində bir neçə nəfər yaralanıb.
Bəhreyn Müdafiə Qüvvələrinin Baş Komandanlığı bazar günü açıqlayıb ki, İsrail və ABŞ-ın Tehrana qarşı müharibəsi fonunda İranın hücumları başlayandan bəri 95 raket və 164 PUA zərərsizləşdirilib.
Əsas zərərçəkənlər
BƏƏ-də Füceyrə hökumətinin media ofisi bildirib ki, aidiyyəti orqanlar zərərsizləşdirilmiş qəlpələrin düşməsi nəticəsində neft zonasında baş verən yanğın hadisəsi ilə məşğul olur. Mülki vətəndaşlar arasında heç bir itkinin olmadığı qeyd edilib və vəziyyəti nəzarətə almaq üçün müvafiq qrupların operativ müdaxilə etdiyi vurğulanıb.
Bu hadisələr münaqişənin genişlənməsi ilə bağlı regional və beynəlxalq narahatlıqların artdığı bir vaxtda, Körfəzdə qarşıdurmanın tüğyan etməsinin qarşısını almaq üçün gərginliyin azaldılması və danışıqlar masasına qayıdışla bağlı davamlı diplomatik çağırışlar fonunda baş verir.
Anadolu Agentliyinin bazar günü axşam saatlarına qədər bu ölkələrdən verilən rəsmi açıqlamalara əsaslanan statistikasına görə, İran 7 ərəb ölkəsindəki obyektləri ən azı 2981 raket və PUA, eləcə də iki qırıcı təyyarə ilə hədəf alıb.
Ərəb ölkələrinə davam edən İran hücumları, İran Prezidenti Məsud Pezeşkianın ötən şənbə günü televiziya ilə etdiyi çıxışında qonşu ölkələrə hücumların dayandırıldığını bəyan etməsinə baxmayaraq baş verir. Prezident çıxışında yalnız "İrana qarşı hər hansı bir hücum həmin ölkələrin ərazisindən başlayacağı təqdirdə" cavab veriləcəyini vurğulamışdı.