BAKI, AzerVoice, Nailə Babazadə

ABŞ, Suriya Prezidenti Əhməd Əş-Şəraanı sanksiya siyahısından çıxardığını elan edib.

AzerVoice xəbər verir ki, ABŞ Dövlət Departamentinin sözçü müavini Tommi Piqott açıqlamasında Dövlət Katibi Marko Rubionun Suriya Prezidenti Əhməd Əş-Şəraanı siyahıdan çıxardığını bildirib.

Piqott bu qərarın “Suriyanın yeni bir dövrə keçidini tanıyan güclü siyasi mesaj” daşıdığını vurğulayıb.

ABŞ Maliyyə Nazirliyinin də Suriya Daxili İşlər Naziri Ənəs Hattabı sanksiya siyahısından çıxardığı bildirilib.

“Bu addımlar Bəşər Əsədin hakimiyyətdən getməsindən sonra Suriya rəhbərliyinin göstərdiyi irəliləyişi qiymətləndirmək məqsədilə atılıb. Prezident Şəraanın rəhbərlik etdiyi yeni Suriya hökuməti, itkin düşmüş amerikalıların tapılması, terror və narkotiklərlə mübarizə öhdəliklərinin yerinə yetirilməsi, kimyəvi silahların aradan qaldırılması, regional təhlükəsizlik və sabitliyin təşviqi, eləcə də Suriyanın rəhbərliyində və onun dəstəyi ilə aparılan inklüziv siyasi prosesi dəstəkləmək üçün ciddi səylər göstərir.” - deyə Piqott qeyd edib.

Piqott həmçinin ABŞ-ın Suriya xalqının sülh, sabitlik və yenidənqurma səylərinə dəstəyini davam etdirəcəyini bildirib.

BMT Təhlükəsizlik Şurası 6 noyabrda Suriya Prezidenti Şəraa və Hattaba qarşı tətbiq olunan sanksiyaların ləğvini tələb edən qətnaməni qəbul etmişdi.