BAKI,AzerVoice
ABŞ Prezidenti Donald Tramp İsrail və HƏMAS arasında əldə olunan atəşkəs razılaşmasına münasibət bildirərək, Amerika Birləşmiş Ştatlarının Qəzzada sülhün qorunması prosesinə fəal şəkildə qatılacağını bəyan edib.AzerVoice xəbər verir ki, bu haqda Tramp “Fox News” telekanalına verdiyi açıqlamada deyib.
“İki illik müharibədən dağılan Qəzza zolağı “daha təhlükəsiz və sabit yerə çevriləcək. Biz inanırıq ki, Qəzza zolağı daha təhlükəsiz olacaq, yenidən qurulacaq. Bölgədəki ölkələr, böyük sərvətlərə sahib dövlətlər, bu prosesə dəstək verəcəklər. ABŞ da onların uğur qazanmasına və sülhün qorunmasına kömək etmək üçün bu prosesin bir hissəsi olacağıq.”-deyə Tramp bildirib.
Prezident həmçinin bildirib ki, Qəzzada saxlanılan girovların azad edilməsi çox güman ki, gələn həftənin bazar ertəsi həyata keçiriləcək.
“Düşünürəm ki, girovlar bazar ertəsi geri qaytarılacaq və bu, həlak olanların cəsədlərini də əhatə edəcək.”-deyə o qeyd edib.
Xatırladaq ki, 2023-cü il 7 oktyabrda Həmasın İsrailə hücumu zamanı 251 nəfər girov götürülmüşdü. Onlardan 47-si hələ də Qəzzada saxlanılır, İsrail ordusunun məlumatına görə, 25 nəfər artıq həyatını itirib.
Qedy edək ki, bu gün HƏMAS Qəzzada atəşkəs razılaşmasına nail olunduğunu elan etdi.AzerVoice xəbər verir ki,razılaşma işğal qüvvələrinin çıxarılması, humanitar yardımların daxil olması və əsirlərin mübadiləsini əhatə edir.
Fələstin İslam Müqavimət Hərəkatı - HƏMAS, Qəzzada davam edən müharibənin başa çatdırılmasını nəzərdə tutan razılaşmanın əldə edildiyini bəyan edib.
Hərəkatın açıqlamasında bildirilir ki, əldə olunmuş razılaşma müharibənin dayandırılması, İsrail işğal qüvvələrinin Qəzzadan çıxarılması, humanitar yardımların bölgəyə daxil olması və əsirlərin qarşılıqlı mübadiləsi kimi əsas maddələri əhatə edir.
HƏMAS rəhbərliyi razılaşmanın Qəzzada uzunmüddətli sülh və sabitliyin bərpasına, eyni zamanda humanitar böhranın yüngülləşdirilməsinə töhfə verəcəyinə ümid etdiklərini bildirib.