BAKI, AzerVoice, Səməd Əyyubov

Dohada Ərəb Dövlətləri Liqasına (ƏDL) və İslam Əməkdaşlıq Təşkilatına (İƏT) üzv ölkələrin xarici işlər nazirlərinin fövqəladə qapalı iclası keçirilir. İclas İsrailin HƏMAS-ın Dohadakı iqamətgahına endirdiyi hava zərbəsinə həsr olunub.

AzerVoice xəbər verir ki, iclasın əsas məqsədi İsrailin HƏMAS siyasi bürosunun üzvlərinə qarşı hücumu ilə bağlı vahid mövqenin formalaşdırılmasıdır.

Qətər baş nazirinin müşaviri və Xarici İşlər Nazirliyinin rəsmi nümayəndəsi Məcid əl-Ənsarinin sözlərinə görə, iştirakçılar həmçinin sabah Dohada keçiriləcək ƏDL və İƏT sammitinin yekun qətnamə layihəsini hazırlayacaqlar.

Gözlənilir ki, ərəb və islam ölkələrinin liderləri HƏMAS-ın iqamətgahına zərbələri sərt şəkildə pisləyəcək və Qətər hakimiyyəti ilə həmrəylik nümayiş etdirəcəklər. Yekun sənəddə, həmçinin vasitəçilik missiyasını həyata keçirən dövlətlərin ərazilərinə edilən hücumların yolverilməzliyi xüsusi vurğulanacaq.

Qətərin baş naziri və xarici işlər naziri Məhəmməd bin Əbdürrəhman Al Tani bəyan edib ki, hökumət bu hücumu dövlət terrorizmi aktı kimi qiymətləndirir. Onun sözlərinə görə, zərbə HƏMAS rəhbərlərinin ABŞ-ın Qəzza zolağında münaqişənin həlli ilə bağlı son təklifini müzakirə etdiyi vaxt endirilib.

Al Tani əlavə edib ki, İsrailin hücumu HƏMAS-ın saxladığı israilli girovların azad olunacağına dair bütün ümidləri məhv edib. Bu səbəbdən Qətər Qəzza üzrə vasitəçilik missiyasında iştirakını yenidən nəzərdən keçirir.