BAKI, AzerVoice, Səməd Əyyubov
“Yedioth Ahronoth” qəzeti İsrailin Qəzzaya qarşı apardığı müharibəyə dair beynəlxalq miqyasda aparılan kampaniyanı təhlil edərək yazıb ki, bu kampaniya artıq yalnız İsrailin Qəzzadakı fəaliyyətlərinə deyil, ümumilikdə onun mövcudluğuna qarşı yönəlib.
AzerVoice-un məlumatına görə, qəzetin yazarı Ben-Dror Yemini məqaləsində HƏMAS-ın “çox uğurla həyata keçirdiyi” və İsraili diplomatik təcridə, həmçinin sürətlə genişlənən boykotlara sürükləyən “mənfi təbliğat”ından xəbərdarlıq edib.
Onun fikrincə, baş nazir Benyamin Netanyahunun hökuməti beynəlxalq aləmdə yaranmış ciddi siyasi zərəri görməməzlikdən gələrək İsraili təhlükəli iflas həddinə aparır.
Yemini məqaləsinə ABŞ-dakı sorğularla başlayıb. Nəticələrə görə, fələstinlilərə dəstək 37 faizə yüksəlib, İsrailə dəstək isə 36 faizdə qalıb. O, bunu “ilk dəfə müşahidə olunan tarixi dönüş” adlandırıb.
Məqalədə vurğulanır ki, İsrail artıq ABŞ Demokrat Partiyası seçicilərinin böyük əksəriyyətinin dəstəyini itirib, Respublikaçılar Partiyasının gəncləri arasında da nüfuzunu xeyli zəiflədib. Bu meyl ABŞ-ın İsrailə hərbi yardımlarını birbaşa sual altına qoya bilər.
Yemini, Netanyahunun son açıqlamalarını xatırladaraq yazıb: “Netanyahu demişdi ki, düşmənlərimiz üzərində qələbə ilə bizə qarşı aparılan mənfi təbliğat arasında seçim etmək lazım gəlsə, mən qələbəni seçərəm.” Lakin müəllifin sözlərinə görə, Netanyahu bununla “qələbənin sadəcə illüziya olduğunu” görməzdən gəlir. Halbuki 7 oktyabr hücumlarından sonra HƏMAS-ın qurduğu təbliğat İsrailə ən böyük diplomatik zərbəni vurub. Dünyada yaranan sərt reaksiyaların başlıca səbəbi isə İsrailin Qəzzadakı mülki əhaliyə qarşı həyata keçirdiyi soyqırım və aclıq siyasəti olub.
Yemini iddia edir ki, “HƏMAS hücuma başlayarkən İsrailin sərt cavab verəcəyini bilirdi və dağıntılar, aclıq və soyqırımla bağlı ittihamların İsraili beynəlxalq müstəvidə zəiflədəcəyinə ümid edirdi. Bu məqsədinə də nail oldu.”
Məqalədə dönüş nöqtəsi kimi İsrail ordusunun Rəfah şəhərinə daxil olması göstərilir. Müəllifə görə, bu addım “siyasi çöküşün başlanğıcı” olub. Çünki bundan sonra ABŞ İsrailə silah göndərişlərini ləngitdi, diplomatik zərər isə görünməmiş dərəcədə dərinləşdi.
Yemini sonda vurğulayıb ki, “İsrailin ən yaxın dostları artıq onu müdafiə edə bilmir, dünya isə baş verənləri müharibə cinayətləri kimi qəbul edir”.