BAKI, AzerVoice, Nərmin Ağayeva

İsrailin Qəzzanı işğal etməsi 2 milyondan çox dinc sakini fəlakətə sürükləyəcək.

AzerVoice xəbər verir ki, Fələstin Xarici İşlər Nazirliyi İsrailin Qəzzaya planlaşdırdığı işğalın bölgədə yaşayan milyonlarla insanı həyati təhlükə ilə üz-üzə qoyacağı barədə xəbərdarlıq edib. Nazirliyin açıqlamasında qeyd olunub ki, Qəzzanın işğalı soyqırımı və aclığı daha da dərinləşdirəcək, şəhərin infrastrukturu tamamilə dağıdılaraq 2 milyondan çox dinc sakini fəlakətə sürükləyəcək.

Açıqlamada vurğulanıb ki, Qəzzada yaşanan aclıq təbii səbəblərdən deyil, İsrailin yardımı “müharibə silahı” kimi əngəlləmək məqsədli siyasətindən qaynaqlanır.
“Beynəlxalq ictimaiyyətin bu aclığı dayandıra bilməməsi ölkələrin və qurumların mənəvi dəyərlərinə ciddi zərbə vurur”, – deyə bəyanatda bildirilib. Nazirlik həmçinin beynəlxalq qurumları, xüsusilə BMT-ni minlərlə insanın həyatını xilas etmək üçün məcburi addımlar atmağa çağırıb.

Qeyd edək ki, avqustun 8-də İsrail Təhlükəsizlik Kabineti Qəzzanın şimalında yerləşən şəhərin işğalı planını təsdiqləyib. Baş nazir Benyamin Netanyahu bütün Qəzza zolağının işğalını hədəflədiklərini bəyan edib. Plana görə, birinci mərhələdə təxminən bir milyon fələstinlinin cənuba köçürülməsi, şəhərin mühasirəyə alınması və intensiv hücumların ardından işğalı nəzərdə tutulur. İkinci mərhələdə isə Qəzzanın mərkəzində yerləşən qaçqın düşərgələrinin nəzarətə götürülməsi planlaşdırılır.

İsrail 1967-ci ildən 2005-ci ilə qədər 38 il ərzində Qəzza zolağını işğalda saxlayıb. Hazırda 2,3 milyon insanın yaşadığı ərazi 18 ildir ki, ağır blokada altındadır.