BAKI, AzerVoice, Səməd Əyyubov

İsrail ordusunun Baş Qərargah rəisi Eyal Zamir, Təhlükəsizlik Kabinetinin təsdiqlədiyi Qəzza işğalı planının həyata keçirilə bilməsi üçün təxminən 200 min ehtiyat əsgərə ehtiyac olduğunu bildirib.

AzerVoice xəbər verir ki, bu barədə İsrail dövlət televiziyası KAN adı açıqlanmayan mənbəyə istinadən məlumat yayıb.

Məlumata əsasən, Zamir bu sayın böyük hissəsinin əvvəllər uzun müddət ehtiyat xidmətində olmuş şəxslərdən ibarət olacağını qeyd edib.

Onun sözlərinə görə, planın icrası çərçivəsində mülki əhali üçün xəstəxanalar yaradılmalı, eyni zamanda, ordunun hazırda təmin edə bilmədiyi miqdarda humanitar yardım bölgəyə çatdırılmalıdır.

Qeyd edək ki, İsrailin Təhlükəsizlik Kabineti Qəzza şəhərinin işğalını nəzərdə tutan yeni hərbi planı təsdiqləyib. İsrail Baş naziri Benyamin Netanyahu “Fox News” telekanalına verdiyi müsahibədə Qəzzaya tam nəzarəti ələ keçirməyi hədəflədiklərini açıqlayıb.

Məlumata görə, iclas zamanı daxili təhlükəsizlik naziri İtamar Ben-Qvir Qəzzaya humanitar yardımın buraxılmasına və sahə xəstəxanalarının qurulmasına qarşı çıxıb.

Ben-Qvirin bu mövqeyinə cavab olaraq, Zamir bildirib ki, belə olan halda Qəzzada saxlanılan israilli girovların azad olunması artıq müharibənin prioritet hədəflərindən çıxarılmalıdır.

Netanyahunun təqdim etdiyi plana əsasən, Qəzza şəhərinin əhalisi cənub bölgələrinə köçürüləcək, şəhər tam mühasirəyə alınacaq və sıx yaşayış məntəqələrinə əlavə hücumlar təşkil olunacaq.

Qeyd edək ki, İsrail ordusunda hazırda 170 min aktiv hərbi qulluqçu xidmət edir. Bunlardan 126 mini quru qoşunlarında, 9 min 500-ü dəniz qüvvələrində, 34 mini isə hava qüvvələrindədir. Bundan əlavə, İsrailin 465 min nəfərlik ehtiyat hərbi kontingenti mövcuddur.