BAKI, AzerVoice

Türkiyənin xarici işlər naziri Hakan Fidan sabah Səudiyyə Ərəbistanının Ciddə şəhərində keçiriləcək İslam Əməkdaşlıq Təşkilatının (İƏT) Xarici İşlər Nazirləri Şurasının (ECM) fövqəladə iclasında iştirak edəcək.

AzerVoice xəbər verir ki, iclasın əsas mövzusu İsrailin Fələstin xalqına qarşı davam edən hücumları və fələstinlilərin torpaqlarından qovulması ilə bağlı çağırışlar olacaq.

İclas ABŞ Prezidenti Donald Trampın “Fələstin xalqının öz torpaqlarından çıxarılması” çağırışına İƏT üzvlərinin birgə reaksiyasını bildirmək məqsədilə keçirilir.

Fidanın toplantıda Türkiyənin fələstinlilərin öz müqəddəratını təyin etmə hüququnu müdafiə etməyə davam edəcəyini, Qəzzanın yenidən qurulması səylərinin önəmini vurğulayacağını və beynəlxalq hüquqa uyğun olmayan hər hansı məcburi köçürmə planını rədd edəcəyini bildirməsi gözlənilir.

Qəzzada atəşkəsin daimi olması və fasiləsiz humanitar yardımların təmin edilməsi əsas prioritetlərdən biri olması məsələlərinin Fidanın çıxışında vurğulaması gözlənilir.

Misirin rəhbərliyi altında hazırlanan və fələstinlilərin öz torpaqlarında qalmasını əsas götürən Qəzzanın yenidən qurulması planı Ərəb Liqasının Qahirədə keçirilən fövqəladə zirvəsində qəbul edilib.

Bu planın həmçinin İƏT-in Xarici İşlər Nazirləri Şurasının iclasında da müzakirə ediləcəyi gözlənilir.