BAKI,VOA
Azərbaycanın mədəniyyət naziri Adil Kərimli sentyabrın 2-də bp şirkətinin Xəzər, Mərkəzi Asiya və Türkiyə üzrə bölgə prezidenti Cio Kristofoli ilə görüşüb. Görüşdə mədəniyyət sahəsində mövcud əməkdaşlıq və əlaqələrin daha da genişləndirilməsi imkanları müzakirə edilib.
VOA xəbər verir ki, Adil Kərimli Azərbaycan ilə bp arasında uğurlu əməkdaşlığın mühüm istiqamətlərindən birinin mədəniyyət sahəsi olduğunu bildirib. Nazir şirkətin Azərbaycanda həyata keçirilən müxtəlif mədəni layihələrə verdiyi töhfəni yüksək qiymətləndirib.
Görüşdə bp-nin muzey və sərgilərin təşkilinə, yaradıcı təşəbbüslərin təşviqinə, eləcə də Azərbaycanın görkəmli mədəniyyət xadimlərinin irsinə həsr olunan nəşrlərin hazırlanmasına göstərdiyi dəstək xüsusi qeyd olunub.
Cio Kristofoli bildirib ki, bp Azərbaycanda mədəniyyət sahəsində müxtəlif layihələrin həyata keçirilməsinə bundan sonra da dəstək göstərməyə hazırdır.
Tərəflər mövcud əlaqələrin daha da genişləndirilməsi imkanlarını müzakirə ediblər. Eyni zamanda, tarixi filmlərin çəkilişi sahəsində mümkün əməkdaşlıq ətrafında fikir mübadiləsi aparılıb.
Adil Kərimli Cio Kristofolini Mədəniyyət Nazirliyinin Yaradıcı Mərkəzi ilə tanış olmağa dəvət edib.
Nazir, həmçinin bp-nin bölgə prezidentini oktyabrın 27-dən 29-dək Bakıda keçiriləcək VII Ümumdünya Mədəniyyətlərarası Dialoq Forumuna dəvət edib.
Görüşdə bp-nin Xəzər, Mərkəzi Asiya və Türkiyə bölgəsində kommunikasiya və xarici əlaqələr üzrə vitse-prezidenti Bəxtiyar Aslanbəyli də iştirak edib.
