Bakı, AzerVoice

İsrail ordusu ABŞ-Fransa vasitəçiliyi ilə əldə edilmiş atəşkəs razılaşması ilə müəyyən edilmiş vaxt çərçivəsində Livan ərazisindən çəkilməyə və əraziləri Livan ordusuna təhvil verməyə hazırdır.

AzerVoice xəbər verir ki, bu barədə İsrailin təklükəsizlik rəsmisi məlumat verib.

Məlumatda qeyd olunub ki, İsrail, Livan parlamentinin İsrail qoşunlarının qalmasını rədd etdiyi beş məntəqənin geri çəkilmə prosesinə daxil olub-olmadığını şərh etməsə də, qüvvələrin müəyyən əraziləri Livan ordusuna təhvil verməyə başladığını bildirib.

Qeyd edək ki, atəşkəs razılaşmasına əsasən, İsrail ordusu Livanın cənubundan 60 gün ərzində mərhələli şəkildə geri çəkilməli, Livan ordusu və BMT sülhməramlı qüvvələri isə bölgəyə yerləşdirilməli idi. Daha sonra bu müddət fevralın 18-dək uzadılıb.

Digər tərəfdən, İsrail ordusu Hizbullahın hərəkətlərini izlədiyini və onların mülki geyimdə cənuba keçməyə, sursatları geri qaytarmağa və Bəqaa vadisində silah qaçaqmalçılığına cəhd etdiyini iddia edib.

BMT və Hizbullah isə İsraili atəşkəs müddətində pozuntular törətməkdə ittiham ediblər. İsrail və Hizbullah arasında bir ildən çox davam edən qarşıdurma, o cümlədən iki ay davam edən tammiqyaslı müharibə, 27 noyabr razılaşmasının qüvvəyə minməsindən sonra dayanıb. Hizbullah isə İsrailə qarşı hücumlarının əsas səbəbinin Qəzzada HƏMAS-la həmrəy olduğunu bəyan edib.