BAKI,VOA Orxan Qədirzadə

ABŞ Mərkəzi Komandanlığı (CENTCOM) İran ətrafında tətbiq edilən dəniz blokadası çərçivəsində 44 kommersiya gəmisinin istiqamətinin dəyişdirildiyini açıqlayıb.

CENTCOM sosial media platformasında yaydığı açıqlamada ABŞ qüvvələrinin İrana qarşı tətbiq edilən dəniz blokadasını “ciddi şəkildə həyata keçirməyə davam etdiyini” qeyd edib.

Komandanlığın məlumatına görə, əməliyyatlar çərçivəsində 44 ticarət gəmisi başqa istiqamətə yönləndirilib, iki gəmi fəaliyyətdən çıxarılıb, daha iki gəmidə isə yoxlama və müdaxilə həyata keçirilib.

Bununla yanaşı, İranın yüksək rütbəli hərbi rəsmisi Möhsün Rzai ABŞ-ın Hörmüz boğazındakı fəaliyyətləri ilə bağlı sərt xəbərdarlıq edib.

Rzai bildirib ki, İran ABŞ-ın Hörmüz boğazında Tehran tərəfindən müəyyən edilməyən alternativ gəmiçilik marşrutları yaratmasına heç vaxt imkan verməyəcək. O qeyd edib ki, həmin marşrutlardan istifadə etməyə çalışan ABŞ hərbi gəmiləri də hədəf kimi qiymətləndirilə bilər.

İranlı rəsmi ölkəsinin müharibə istəmədiyini, lakin silahlı qüvvələrin istənilən ssenariyə hazır olduğunu vurğulayıb. O, Vaşinqtonu davranışını dəyişməyə və iyun ayında imzalanmış anlaşma memorandumunun şərtlərinə əməl etməyə çağırıb.

Rzai əlavə edib ki, əks halda ABŞ hərbi gəmiləri ciddi təhlükə ilə üzləşə bilər və İran ordusu bu vəziyyət qarşısında passiv qalmayacaq.

Hörmüz boğazında gərginlik artır

Hörmüz boğazı dünya enerji ticarəti üçün ən mühüm dəniz keçidlərindən biri hesab olunur. Körfəz ölkələrindən ixrac edilən neft və qazın böyük hissəsi bu marşrutdan keçir.

ABŞ və İran arasında son aylarda artan gərginlik bölgədə gəmiçilik təhlükəsizliyi ilə bağlı narahatlıqları artırıb.

Məlumata görə, ABŞ ordusu ötən ay İranın bölgədəki obyektlərinə bir neçə zərbə endirib. Vaşinqton bu əməliyyatları İranın Hörmüz boğazında kommersiya gəmilərinə qarşı təhdid imkanlarını azaltmaq məqsədi ilə əsaslandırıb.

İran isə buna cavab olaraq bölgədə yerləşən ABŞ hərbi bazalarına və obyektlərinə raket və pilotsuz uçuş aparatları ilə zərbələr endirib.