BAKI,VOA Orxan Qədirzadə

Rusiya Müdafiə Nazirliyi Ukraynanın hərbi məqsədlər üçün istifadə etdiyi bildirilən dörd yük gəmisinə və Çornomorsk limanındakı obyektlərə zərbələr endirildiyini açıqlayıb. Moskva hücumların Ukraynanın hərbi texnika və sursat imkanlarına qarşı həyata keçirildiyini bildirib.

Rusiya tərəfinin məlumatına görə, bazar ertəsi axşamı Ukraynanın Nikolayev və Pivdennıy limanlarında yerləşən iki quru yük gəmisinə zərbə endirilib. Bundan əlavə, Odessa şəhərinin cənub istiqamətində Ukrayna limanlarına silah və hərbi avadanlıq daşıdığı iddia edilən daha iki gəminin hədəfə alındığı bildirilib.

Rusiya Müdafiə Nazirliyi açıqlamasında Çornomorsk limanında yerləşən avtomobil komponentləri zavodunun və Ukrayna Silahlı Qüvvələrinin hərbi texnikalarının təmir edildiyi, həmçinin sursat və yanacağın saxlandığı liman terminalının vurulduğunu qeyd edib.

Moskva bu əməliyyatların Ukraynanın hərbi-logistika imkanlarını zəiflətməyə yönəldiyini bildirib.

Hadisə ilə bağlı Rusiya tərəfinin açıqlamalarını müstəqil şəkildə təsdiqləmək mümkün olmayıb.

Çornomorsk limanı Ukraynanın Qara dəniz sahilində yerləşən əsas ticarət limanlarından biri hesab olunur. Liman ölkənin ixrac və logistika imkanlarında mühüm rol oynayır. Qara dənizdə davam edən hərbi əməliyyatlar fonunda bölgədəki liman infrastrukturu və dəniz daşımaları müharibənin əsas hədəflərindən biri olaraq qalır.