BAKI, VOA, Fərid Mikayılov

İsrail həbsxanalarında Bəşşar Əsəd hakimiyyətinin 2024-cü ilin dekabrında devrilməsindən sonra saxlanılan 46 Suriya vətəndaşı hələ də həbsdə qalır.

VOA xəbər verir ki, İsrail iyul ayında bir ildən çox həbsdə saxlanılan dörd suriyalını azad edib. Onlar İsrail ordusunun Suriyaya keçirdiyi əməliyyatlar zamanı saxlanılmışdılar.

Azadlığa buraxılan şəxslərdən birinin qohumu bildirib ki, saxlanılanların əksəriyyətinə həbs olunma səbəbi izah edilməyib və onlar dindirilməyiblər.

Onun sözlərinə görə, saxlanılanlar fiziki zorakılığa məruz qalmayıb, gündə üç dəfə yeməklə təmin olunub və paltarlarını dəyişmək imkanı əldə ediblər.

İsrail ordusu Əsəd hakimiyyətinin süqutundan sonra Quneytra və Dəraa bölgələrində əməliyyatlara başlayaraq yaşayış məntəqələrinə reydlər keçirib və mülki şəxsləri saxlayıb.

Suriyada həbsləri izləyən Sijil Mərkəzinin məlumatına görə, 2024-cü ildən bəri İsrail qüvvələri azı 187 nəfəri saxlayıb və onların böyük hissəsi sonradan sərbəst buraxılıb.

Suriyalı hüquqşünas Əhməd əl-Musa bildirib ki, beynəlxalq hüquqa əsasən bu hallar "məcburi itkin düşmə" kimi qiymətləndirilə bilər.

Onun sözlərinə görə, hazırda 46 suriyalı İsrail həbsxanalarında saxlanılır və bu faktlarla bağlı BMT-nin İnsan Hüquqları Şurasına və Məcburi İtkin Düşmələr üzrə Komitəsinə məlumat təqdim olunub.