BAKI,VOA,Yusif Şərifzadə

Birləşmiş Ərəb Əmirliklərində saxlanılan 55 iranlı balıqçının ölkəsinə qaytarılması prosesinin başladığı bildirilib. İranın Əbu-Dabi şəhərindəki səfirliyi balıqçıların bir hissəsinin artıq ölkəyə qayıtdığını açıqlayıb.

VOA xəbər verir ki, İran səfirliyinin məlumatına görə, Birləşmiş Ərəb Əmirliklərində saxlanılan 55 iranlı balıqçının geri göndərilməsi həyata keçirilir.

Açıqlamada bildirilib ki, balıqçılardan 14 nəfəri artıq dəniz yolu ilə İrana qayıdıb. Digər şəxslərin isə hava yolu ilə ölkəyə göndəriləcəyi qeyd olunub.

İran səfirliyinin məlumatına görə, balıqçılar mart və aprel aylarında saxlanılıblar. Onların naviqasiya sistemlərində yaranan problemlər səbəbindən Birləşmiş Ərəb Əmirliklərinin sahil mühafizəsi tərəfindən tutulduğu bildirilib.

Səfirlik açıqlamasında qeyd edib ki, saxlanılan şəxslərin əsas hissəsi İranın Sistan və Bəlucistan, eləcə də Hörmüzqan vilayətlərinin sakinləridir.

Məlumata əsasən, balıqçılar iki aydan çox müddət ərzində Şüveyhə saxlanma mərkəzində, həmçinin Ras əl-Xeymə və Şarcə şəhərlərindəki həbsxanalarda saxlanılıblar.

Hadisə Körfəz regionunda dəniz hərəkəti və təhlükəsizlik məsələlərinin həssas olduğu bir dövrdə baş verib.