BAKI,VOA,Yusif Şərifzadə

ABŞ və İran arasında dayanmış atəşkəs danışıqlarını yenidən bərpa etmək üçün diplomatik səylər davam edir.

VOA xəbər verir ki, Qətərdən olan vasitəçilərin İran rəsmiləri ilə görüşmək və yeni danışıqlar raundunun keçirilməsi üçün şərait yaratmaq məqsədilə Tehrana səfər etdiyi bildirilir.

Bu təşəbbüslər ABŞ qüvvələrinin İranın beş vilayətində həyata keçirdiyi son hava zərbələrindən sonra başlayıb. İran Səhiyyə Nazirliyinin məlumatına görə, hücumlar nəticəsində 14 nəfər ölüb, 78 nəfər yaralanıb.

İran rəsmilərinin açıqlamasına görə, ABŞ zərbələri hava limanları, logistika şəbəkələri, dəniz müşahidə sistemləri və İranın şimalındakı dəmir yolu infrastrukturunu hədəfə alıb.

Tehran hesab edir ki, son hücumlar ABŞ-la münasibətlərdə etimadsızlığı daha da artırıb. İran rəsmiləri Donald Trampın Türkiyədə keçirilən NATO sammitində memorandumun artıq qüvvədə olmadığını elan etməsinin də razılaşmaya mənfi təsir etdiyini bildirirlər.

İran tərəfinin sözlərinə görə, ABŞ-İran anlaşması tam etimada deyil, “öhdəliyə qarşı öhdəlik” prinsipinə əsaslanır.

Tehran həmçinin iddia edir ki, Tramp əvvəlki vədinə baxmayaraq, İranın ali lideri Ayətullah Əli Xameneinin dəfn mərasimi zamanı ölkəyə hücum edib.

İran rəsmiləri bildirirlər ki, ABŞ Prezidenti Xameneinin Məşhəddə dəfn edildiyi vaxt hərbi əməliyyatlara başlayaraq verdiyi sözdən geri çəkilib.