BAKI,VOA,Yusif Şərifzadə

İraqın Milli Təhlükəsizlik Xidməti paytaxt Bağdadda pilotsuz uçuş aparatlarının hazırlanması cəhdinin qarşısını aldığını açıqlayıb. Əməliyyat zamanı hadisə ilə əlaqəli olduğu bildirilən üç şübhəli şəxs saxlanılıb.

VOA xəbər verir ki, İraqın dövlət xəbər agentliyi Milli Təhlükəsizlik Xidmətinin açıqlamasına istinadən şübhəlilərin Bağdad daxilində pilotsuz uçuş aparatları hazırlamaq cəhdi ilə əlaqədar tutulduğunu bildirib. Təhlükəsizlik qüvvələrinin əməliyyatın gedişində bu fəaliyyətin qarşısını aldığı qeyd olunub.

İraq hakimiyyəti saxlanılan şəxslərin kimliyi barədə əlavə məlumat açıqlamayıb. Onların hər hansı silahlı qrup və ya təşkilatla əlaqəsinin olub-olmadığı da hələlik məlum deyil.

Hazırlanması nəzərdə tutulan pilotsuz uçuş aparatlarının sayı, texniki xüsusiyyətləri və hansı məqsədlə istifadə olunacağı barədə də məlumat verilməyib.

Hadisə bölgədə təhlükəsizlik vəziyyətinin gərgin olduğu bir dövrdə baş verib. Bundan bir neçə gün əvvəl İraqın xarici işlər naziri Fuad Hüseyn və Səudiyyə Ərəbistanının xarici işlər naziri Feysəl bin Fərhan bölgədəki son hadisələri müzakirə ediblər.

Bağdad hökuməti son dövrdə ölkədə silahların yalnız dövlətin nəzarətində olması istiqamətində səylərini gücləndirib. Hakimiyyət müxtəlif silahlı birləşmələrin tərksilah edilməsini də qarşıya məqsəd qoyub.

İraqda fəaliyyət göstərən silahlı birləşmələrin bəzilərinin İranla yaxın əlaqələrə malik olduğu bildirilir. Bağdadda pilotsuz uçuş aparatlarının hazırlanması cəhdinin həmin qruplardan hər hansı biri ilə əlaqəsinin olub-olmadığı barədə isə rəsmi məlumat açıqlanmayıb.