BAKI,VOA,Yusif Şərifzadə

ABŞ-nin maliyyə naziri Skott Bessent Misirin “Banque Misr” bankının Birləşmiş Ərəb Əmirliklərindəki bölmələrinə qarşı tədbirlərin İranla maliyyə əlaqələri səbəbindən görüldüyünü bildirib. ABŞ Maliyyə Nazirliyi həmin bölmələrin İranın maliyyə şəbəkəsinə xidmət göstərdiyini iddia edir.

VOA xəbər verir ki, Bessent bankın BƏƏ-dəki bölmələrinin İranla maliyyə əməliyyatlarını davam etdirdiyini və Vaşinqtonun buna görə məsuliyyət tədbirlərinə başladığını açıqlayıb. ABŞ Maliyyə Nazirliyinin məlumatına görə, 2024-cü ilin yanvarından 2026-cı ilin iyununa qədər həmin bölmələr İranın gizli maliyyə şəbəkəsi ilə əlaqəli ola biləcək 103 şirkət üçün təxminən 1,8 milyard dollarlıq əməliyyat həyata keçirib.

Bessent bildirib ki, ABŞ İrana qarşı həyata keçirdiyi “İqtisadi Təcrid Əməliyyatı” çərçivəsində banklara Tehranla maliyyə əlaqələrini davam etdirməmələri barədə əvvəlcədən xəbərdarlıq edib.

ABŞ-nin maliyyə naziri İranın maliyyə fəaliyyətinə yardım edən qurumların həm ABŞ dollarından, həm də dünya maliyyə sistemindən istifadə imkanlarını itirə biləcəkləri barədə xəbərdarlıq edildiyini vurğulayıb.

ABŞ Maliyyə Nazirliyi “Banque Misr”in BƏƏ-dəki bölmələrinin ABŞ maliyyə qurumlarında müxbir bank xidmətlərindən istifadəsinin dayandırılmasını nəzərdə tutan qayda təklif edib. Tədbir bütövlükdə bankın Misirdəki və digər ölkələrdəki fəaliyyətinə deyil, BƏƏ-dəki bölmələrinə yönəlib.

Vaşinqton bu addımı İranın beynəlxalq maliyyə sisteminə çıxış imkanlarının məhdudlaşdırılmasına yönəlmiş daha geniş iqtisadi təzyiq siyasətinin bir hissəsi kimi təqdim edir.

Bessent digər bank və maliyyə qurumlarına da xəbərdarlıq edərək İranla maliyyə əməkdaşlığının ABŞ maliyyə sisteminə çıxış baxımından ciddi nəticələr doğura biləcəyini bildirib.