BAKI,VOA,Yusif Şərifzadə

İran Xarici İşlər Nazirliyi ABŞ və Körfəz Əməkdaşlıq Şurasının birgə bəyanatına sərt reaksiya verərək, sənədi müdaxilə xarakterli, məsuliyyətsiz və təxribat xarakterli adlandırıb.

VOA xəbər verir ki, nazirliyin yaydığı açıqlamada ABŞ və Körfəz Əməkdaşlıq Şurasının bölgədə qarşıdurma xarakterli davranışların davam etməsi ilə bağlı mövqeyi tənqid olunub.

İran bildirib ki, Hörmüz boğazının idarə olunması, həmçinin İran və Omanın ərazi suları ilə sahillərinin təhlükəsizliyi iki ölkə arasında imzalanmış anlaşma memorandumuna uyğun şəkildə təmin ediləcək.

Tehran ABŞ-ın Körfəz ölkələrinin təhlükəsizliyinin təminatçısı olması ilə bağlı iddialarını reallığın təhrif edilməsi kimi qiymətləndirib. Açıqlamada ABŞ hərbi qüvvələrinin bölgədə mövcudluğunun region xalqları üçün əlavə yük yaratdığı, eyni zamanda qeyri-sabitlik və parçalanmaya səbəb olduğu iddia edilib.

İran Körfəz ölkələrini öz ərazilərinin və infrastrukturunun İrana qarşı qanunsuz fəaliyyətlərin planlaşdırılması, dəstəklənməsi və həyata keçirilməsi üçün istifadəsinə imkan verməməyə çağırıb.

Bununla yanaşı, Tehran Körfəz Əməkdaşlıq Şurasına üzv ölkələri ABŞ-ın İranın dinc nüvə proqramı ilə bağlı mövqeyini dəstəkləməməyə çağıraraq, Yaxın Şərqin nüvə silahından azad bölgəyə çevrilməsi təşəbbüsünü dəstəkləməyə səsləyib.

İran Xarici İşlər Nazirliyi vurğulayıb ki, regionun təhlükəsizliyi xarici dövlətlərin müdaxiləsi ilə deyil, məhz bölgə ölkələrinin birgə əməkdaşlığı hesabına təmin olunmalıdır.