BAKI,VOA,Yusif Şərifzadə

İran bildirib ki, nümayəndə heyəti ABŞ-nin son imzalanmış müvəqqəti razılaşma üzrə öhdəliklərini yerinə yetirməsini təmin etmək məqsədilə İsveçrəyə yola düşür.

VOA xəbər verir ki, bu barədə İran Xarici İşlər Nazirliyinin sözçüsü İsmayıl Bəqai dövlət televiziyasına açıqlamasında bildirib.

Onun sözlərinə görə, səfərin əsas məqsədi qarşı tərəfin üzərinə götürdüyü öhdəliklərin icrasını izləmək və bu məsələdə aydınlıq əldə etməkdir.

İsmayıl Bəqai vurğulayıb ki, İran keçmiş təcrübəni nəzərə alaraq öhdəliklərin yerinə yetirilməsi məsələsində qəti və prinsipial mövqe tutacaq.

Sözçü qeyd edib ki, nümayəndə heyətinin dünən İsveçrəyə getməməsinin səbəbi müvəqqəti razılaşmanın iki ölkə prezidentləri tərəfindən rəqəmsal formada imzalanması olub. Bu səbəbdən həmin görüşün keçirilməsinə təcili ehtiyac qalmayıb.

Bəqainin sözlərinə görə, yekun razılaşmaya dair danışıqların başlanması üçün əvvəlcə mövcud razılaşmanın bir sıra müddəaları icra edilməlidir. O bildirib ki, hazırda bu istiqamətdə kifayət qədər irəliləyiş müşahidə olunmur.

İran rəsmisi əlavə edib ki, İsveçrədə keçiriləcək görüşlərdə ABŞ-nin öhdəlikləri necə həyata keçirəcəyinə dair konkret izahat tələb olunacaq.