BAKI,VOA,Yusif Şərifzadə
İranın xarici işlər naziri Abbas Əraqçi bildirib ki, müharibənin bütün cəbhələrdə, o cümlədən Livanda dayandırılması ilə bağlı əsas öhdəlik və məsuliyyət ABŞ-nin üzərinə düşür.
VOA xəbər verir ki, bu barədə Abbas Əraqçi Pakistanın xarici işlər naziri Məhəmməd İshaq Dar ilə telefon danışığı zamanı bildirib. İran Xarici İşlər Nazirliyinin yaydığı məlumata görə, Əraqçi ABŞ ilə əldə olunmuş anlaşma memorandumunun şərtlərinə əməl edilməsinin vacibliyini vurğulayıb.
İranlı nazir qeyd edib ki, memorandumun hər hansı şəkildə pozulması birbaşa ABŞ-yə yönəlmiş addım kimi qiymətləndiriləcək.
Əraqçi eyni zamanda belə bir addımın ciddi nəticələr və əks-təsirlər doğura biləcəyi barədə xəbərdarlıq edib. O vurğulayıb ki, bölgədə sabitliyin qorunması üçün əldə olunmuş razılaşmaların tam şəkildə icra olunması vacibdir.
Açıqlama Livanda atəşkəsin gələcəyi və bölgədəki təhlükəsizlik vəziyyəti ilə bağlı müzakirələrin davam etdiyi bir vaxtda səsləndirilib.