BAKI,VOA, Fərid Mikayılov

İran Beynəlxalq Atom Enerjisi Agentliyinin (BAEA) son hesabatını və qurumun baş direktoru Rafael Qrossinin açıqlamalarını tənqid edib.

VOA xəbər verir ki, İran xarici işlər nazirinin hüquqi və beynəlxalq məsələlər üzrə müavini Kazem Qəribabadi sosial şəbəkədə paylaşdığı açıqlamada BAEA-nı İranın nüvə proqramına münasibətdə siyasi qərəz nümayiş etdirməkdə ittiham edib.

Qəribabadi bildirib ki, İranın bəzi nüvə obyektləri ilə bağlı “qeyri-müəyyənlik” və “çıxış imkanlarının məhdudluğu” barədə iddialar ABŞ və İsrail tərəfindən həyata keçirilən hücumların nəticəsidir. Onun sözlərinə görə, beynəlxalq nəzarət altında olan nüvə obyektlərinə zərbələr endirildiyi halda, BAEA həmin hücumları pisləməyib.

İran rəsmisi vurğulayıb ki, agentlik yaranmış vəziyyətin səbəblərini nəzərə almadan, onun nəticələrindən istifadə edərək Tehrana qarşı ittihamlar irəli sürür.

Qəribabadi həmçinin bildirib ki, nüvə obyektlərinə hücumlar təkcə İranın suverenliyinə deyil, həm də nüvə silahlarının yayılmaması rejiminə və beynəlxalq təminat mexanizmlərinin etibarlılığına zərbə vurur.

O, İranın uranın 60 faiz zənginləşdirilməsi ilə bağlı tez-tez gündəmə gətirilən iddiaların texniki deyil, siyasi xarakter daşıdığını bildirib və ölkəsinin nüvə proqramının BAEA ilə mövcud razılaşmalar çərçivəsində həyata keçirildiyini qeyd edib.