BAKI,VOA,Yusif Şərifzadə

İranın Hörmüz boğazı ilə bağlı mövqeyinin dəyişmədiyi və Tehranın strateji su yolu üzərində təsir imkanlarını qorumaqda israrlı olduğu bildirilir.

VOA xəbər verir ki, Orta Şərq Strateji Araşdırmalar Mərkəzinin baş elmi işçisi Abas Aslani İranın ABŞ-ın hərbi təzyiqləri, iqtisadi sanksiyaları və mümkün dəniz blokadasına baxmayaraq Hörmüz boğazı üzərində nəzarət məsələsində geri addım atmağa meylli görünmədiyini bildirib.

Ekspertin sözlərinə görə, Tehran boğazdan keçidin tam bağlanmasını deyil, onun “yeni idarəetmə mexanizmləri” ilə fəaliyyət göstərməsini istəyir.

Aslani qeyd edib ki, İran və Oman sahilyanı dövlətlər olaraq bu prosesdə əsas qərarverici aktorlar olmalıdır.

“Bu tələbdən imtina etmək ölkə üçün təhlükəsizlik riskləri yarada bilər,” — deyə o bildirib.

Analitik hesab edir ki, İranın mövcud mövqeyi yalnız iqtisadi maraqlarla deyil, həm də milli təhlükəsizlik və geosiyasi təsir məsələləri ilə bağlıdır.

Ekspertlərin fikrincə, Tehran Hörmüz boğazına nəzarəti regionda strateji balansın əsas elementlərindən biri kimi qiymətləndirir və bu mövzuda geri çəkilmək niyyətində deyil.

Hörmüz boğazı dünya neft və qaz daşımalarının mühüm hissəsinin keçdiyi əsas marşrutlardan biri hesab olunur. Buna görə də bölgədə yaranan hər hansı gərginlik qlobal enerji bazarlarına və beynəlxalq ticarətə birbaşa təsir göstərə bilər.

Son həftələr ABŞ və İran arasında artan qarşıdurma, qarşılıqlı ittihamlar və hərbi aktivlik bölgədə təhlükəsizlik risklərini daha da artırıb.

Müşahidəçilər hesab edirlər ki, Tehran tərəfindən səsləndirilən “yeni idarəetmə mexanizmləri” ideyası gələcəkdə Hörmüz boğazının statusu və təhlükəsizlik rejimi ilə bağlı yeni regional mübahisələrə səbəb ola bilər.