BAKI,VOA

ABŞ-ın İran limanlarına qarşı tətbiq etdiyi dəniz mühasirəsi çərçivəsində bölgədə ən azı 15 hərbi gəminin yerləşdirildiyi açıqlanıb. VOA xəbər verir ki, “CNN”in ABŞ rəsmilərinə istinadən verdiyi məlumata görə, bu qüvvələr arasında “USS Abraham Lincoln” aviadaşıyıcısı və 11 müasir esmines də var.

Məlumata görə, “USS Gerald R. Ford” aviadaşıyıcısı ötən ay Yunanıstanda təmir işlərindən sonra hazırda Şərqi Aralıq dənizindədir. Onun mühasirəyə qoşulması üçün Süveyş kanalından keçməsi və ya Afrika ətrafından dolanması tələb olunur.

Bölgədəki ABŞ esminesləri arasında “USS Bainbridge”, “USS Thomas Hudner”, “USS Frank E. Petersen Jr.”, “USS Delbert D. Black”, “USS John Finn”, “USS Michael Murphy”, “USS Mitscher”, “USS Pinckney”, “USS Rafael Peralta”, “USS Spruance” və “USS Milius” kimi gəmilər yer alır. Bundan əlavə, “USS Tripoli”, “USS New Orleans” və “USS Rushmore” kimi amfibiya gəmiləri də bölgədə fəaliyyət göstərir.

ABŞ Mərkəzi Komandanlığı bildirib ki, mühasirə bütün ölkələrin İran limanlarına daxil olan və çıxan gəmilərinə eyni qaydada tətbiq olunacaq. Bu addım Körfəz və Oman körfəzində gərginliyi daha da artırıb.

Xatırladaq ki, Vaşinqton və Tehran arasında İslamabadda aparılan son danışıqlar nəticəsiz başa çatmış, tərəflər bir-birini ittiham etmişdi. 8 aprel tarixində isə Pakistan vasitəçiliyi ilə iki həftəlik atəşkəs elan olunmuşdu.