BAKI,VOA,Yusif Şərifzadə
ABŞ Mərkəzi Komandanlığı Hörmüz boğazında iki kommersiya gəmisinin marşrutunun dəyişdirildiyini açıqlayıb.
VOA xəbər verir ki, ABŞ Mərkəzi Komandanlığının yaydığı məlumata görə, Vaşinqtonun çərşənbə axşamı İrana qarşı dəniz blokadasını yenidən tətbiq etməsindən sonra iki ticarət gəmisinin hərəkət istiqaməti dəyişdirilib.
Açıqlamada gəmilərin hansı ölkələrə məxsus olduğu, hara yönləndirildiyi və marşrutun hansı səbəbdən dəyişdirildiyi barədə əlavə məlumat verilməyib.
ABŞ tərəfi yalnız təhlükəsizlik tədbirləri çərçivəsində iki gəminin başqa istiqamətə yönəldiyini bildirib.
Hörmüz boğazında son günlər hərbi gərginliyin artması beynəlxalq gəmiçilik və enerji daşımaları ilə bağlı narahatlıqları daha da gücləndirib.
Boğaz dünya üzrə neft və mayeləşdirilmiş təbii qaz tədarükünün ən mühüm marşrutlarından biri hesab olunur.
İran tərəfi isə ABŞ Mərkəzi Komandanlığının bu açıqlamasına hələlik rəsmi münasibət bildirməyib.