BAKI,VOA, Orxan Qədirzadə

ABŞ-ın vitse-prezidenti Cey Di Vens rəsmi Vaşinqtonla Tehran arasında əldə olunmuş atəşkəs razılaşmasını "kövrək" adlandıraraq, İran tərəfinə xəbərdarlıq edib.

VOA xəbər verir ki, Macarıstanın ali təhsil müəssisələrindən birində çıxış edən vitse-prezident Vens ABŞ-İran münasibətlərindəki son gərginliyi və əldə olunmuş müvəqqəti razılaşmanı şərh edib. O bildirib ki, Prezident Donald Tramp İran rəhbərliyinə vaxt qoyaraq, Hörmüz boğazının dərhal açılmasını və qlobal iqtisadiyyatın girov saxlanılmasına son qoyulmasını tələb edib. İranın bu şərtləri qəbul etməsi qarşılığında ABŞ və müttəfiqləri hücumları dayandırmağa razılıq veriblər.

Vens İran tərəfini danışıqlarda "xoş məram" nümayiş etdirməyə çağıraraq bildirib: "Əgər iranlılar xoş niyyətlə hərəkət etməsələr, Prezident Trampın güzəştə gedən biri olmadığını görəcəklər. Ümid edirəm ki, Tehran düzgün qərar verəcək". Vitse-prezident əlavə edib ki, Trampın səbri tükənməkdədir və onunla manipulyasiya etmək mümkün deyil.

İran hakimiyyəti daxilində razılaşmaya münasibətin birmənalı olmadığını qeyd edən Vens, xarici işlər naziri Abbas İraqçinin şərtləri qəbul etdiklərini bildirməsinə baxmayaraq, rejimin digər qanadlarının atəşkəsi təkzib etdiyini vurğulayıb. Məhz bu daxili ziddiyyətlərə görə o, hazırkı vəziyyəti "kövrək atəşkəs" kimi xarakterizə edib. Trampın "iranlılar döyüşçü olmaqdan daha çox, yaxşı danışıqlar aparandır" sözlərini xatırladan vitse-prezident, ABŞ-ın İranın hərbi potensialını məhv etmək hədəfinə artıq çatdığını bəyan edib.

Qeyd edək ki, "Reuters" agentliyinin məlumatına görə, atəşkəs danışıqlarındaVens Pakistan vasitəçiləri ilə görüşərək Trampın xüsusi şərtlərini tərəflərə çatdırmaqda mühüm rol oynayıb. Tramp iki həftəlik müddətə bombardmanların dayandırılmasını Hörmüz boğazının tam və təhlükəsiz şəkildə naviqasiyaya açılması şərti ilə qəbul edib.