BAKI,VOA, Fərid Mikayılov

ABŞ Prezidenti Donald Tramp İrana qarşı verdiyi ultimatumun müddəti bitmək üzrə ikən dünya ictimaiyyətini sarsıdan növbəti bəyanatla çıxış edib.

VOA xəbər verir ki, Ağ Ev rəhbəri bu gecə İranın hərbi və mülki infrastrukturuna qarşı həyata keçiriləcək mümkün zərbələrin miqyası barədə ən sərt xəbərdarlığını edib.

Tramp medianın suallarını cavablandırarkən baş verə biləcək hadisələrin tarixi dramatikliyini vurğulayıb. O, tətbiq ediləcək hərbi gücün İranın mövcud dövlət və sivilizasiya strukturuna sarsıdıcı zərbə vuracağını bildirib.

“Bu gecə bütün bir sivilizasiya yox olacaq və bir daha asla geri gəlməyəcək. Bunun olmasını istəmirəm, amma ehtimal ki, baş verəcək”- deyə o bildirib.

Trampın bu sözləri daha əvvəl səsləndirdiyi "Körpülər və Elektrik Stansiyaları Günü" təhdidinin sadəcə iqtisadi deyil, həm də total bir hərbi əməliyyatın anonsu olduğunu göstərir. Analitiklər qeyd edirlər ki, "sivilizasiyanın yox olması" ifadəsi İranın bütün idarəetmə sisteminin, enerji şəbəkəsinin və rabitə infrastrukturunun hədəfə alınması deməkdir.

Qlobal bazarlarda həyəcan

Bu bəyanatdan dərhal sonra qlobal neft və qızıl bazarlarında kəskin qiymət artımları qeydə alınıb. Vaşinqtonun bu qətiyyətli mövqeyi fonunda İranda dəmir yolu nəqliyyatının dayandırılması və mülki əhalinin strateji obyektlərdən uzaqlaşması prosesi sürətlənib.