BAKI,VOA, Nailə Babazadə

İsrail ordusu ABŞ ilə birgə həyata keçirdiyi əməliyyatlar çərçivəsində fevralın 28-dən bu yana İranda 3 mindən çox hədəfi vurduğunu bəyan edib.

VOA xəbər verir ki, İsrail ordusundan edilən yazılı açıqlamada Tehran rəhbərliyinə məxsus obyektlərə hücumların davam etdiyi bildirilib. Məlumatda qeyd olunub ki, İsrail döyüş təyyarələri fevralın 28-də ABŞ ilə birlikdə başladığı hücumlarda İran ərazisində 3 mindən çox hədəfə zərbə endirib.

Bundan əlavə, dünən İranın qərb və mərkəzi bölgələri ilə yanaşı, paytaxt Tehrana qarşı "genişmiqyaslı hava hücumlarının" həyata keçirildiyi və 50-dən çox hədəfin vurulduğu iddia edilib. Dünən hədəf alınan obyektlər arasında İran İslam İnqilabı Keşikçiləri Korpusuna (SEPAH) məxsus iki kəşfiyyat komandanlıq qərargahı, Kəşfiyyat Nazirliyinin komanda mərkəzi, həmçinin silah və ballistik raket anbarları ilə hava hücumundan müdafiə sistemlərinin olduğu irəli sürülüb.

Qeyd edək ki, ABŞ və İran arasında nüvə proqramı ilə bağlı danışıqlarda konkret razılaşma əldə olunmadığına görə, 28 fevraldan etibarən ABŞ və İsrail İrana hərbi hava hücumlarına başlayıb. Buna cavab olaraq İran da həmin gündən etibarən İsrailə və ABŞ-nin region ölkələrindəki hərbi obyektlərinə raket və dronlarla hücum edib.

İrana hərbi hava hücumlarının ilk günündə İranın Ali Lideri Ayətullah Seyid Əli Xamenei, bir sıra yüksək vəzifəli hərbçilər ölüb. 8 martda İranın Ekspertlər Məclisi səsçoxluğu ilə Ayətullah Seyid Əli Xameneinin oğlu Seyid Muctaba Xameneini İranın 3-cü Ali Lideri seçib.

1-5 mart tarixlərində qarşıdurma daha da genişlənərək Yaxın Şərqin müxtəlif ölkələrini əhatə edib.
ABŞ tərəfinin itkisinin 8 ölü, 140-dan çox yaralı olduğu bildirilib.