BAKI,AzerVoice Analitik Təhlil Mərkəzi
Türkiyə, Dəməşq rəhbərliyi ilə əldə olunan razılaşma çərçivəsində suriyalı əsgərlərə hərbi təlim verməyə başlayıb. Komando və piyada hazırlığı da bu proqramlara daxildir. Təlim alacaq suriyalı hərbçilər daha sonra TSK tərəfindən öz ölkələrində də hazırlığa cəlb olunacaqlar. Türkiyə, Somali və Liviyada həyata keçirilən modelə bənzər şəkildə Suriyada da hərbi məktəb və gizir məktəbi qurmağı planlaşdırır. Bu barədə “Yeni Şafak”a danışan mənbələr belə deyib: “Biz Türkiyə olaraq Suriya ordusunun müdafiə qabiliyyətini gücləndirmək üçün təlim və məsləhətçilik edəcəyik. Təlimlərə başladıq, əsgərlərin hazırlığı artıq gedir”.
Hər cür dəstək veriləcək
Türkiyə təlim dəstəyinə başlayarkən, Dəməşq hökumətinin 10 mart razılaşmasına əməl etməməsi halında YPG-yə qarşı mümkün müdaxiləsinə də dəstək göstərməyə hazırdır. Məsələyə dair mənbələr Türkiyənin mövqeyini belə izah edib: “Biz dəstək olarıq. Orada indi bir hökumət var. Hökumət öz birliyini, bütövlüyünü qorumaqla məsuldur. Əvvəlki kimi deyil. Keçmişdə bizim əməliyyat apardığımız dövrlərdə bir Əsəd hökuməti vardı, onların ölkəni bir arada saxlamaq niyyətləri yox idi. İndi isə birlik və bütövlük yaratmağa çalışan bir hökumət var. Onlar əvvəl tədbir görəcəklər, biz də dəstək verəcəyik”.
Tunellər tam nəzarətdədir
Bununla yanaşı, Suriyada nəzarəti altındakı bölgələrdə 580 kilometr uzunluğunda tuneli məhv edən Türkiyə, YPG-nin son günlərdə gündəmə gələn yeni tunel qazma cəhdlərini də yaxından izləyir. Bölücü təşkilatın Suriya qolu PYD-nin İraqın şimalında mağara qazdığı kimi, Suriyada da düzənlik ərazilərdə tunel qazdığı qeyd olunur. Bu çərçivədə “bəzi yerlərdə yeni qazıntılar var, amma əvvəlki qədər genişmiqyaslı deyil” müşahidəsi aparılıb. Sahədə Dəməşq rəhbərliyi ilə SDQ arasında toqquşmaların yaşanmadığı bildirilir. Tərəflər arasında 10 mart razılaşması hələ də qüvvədədir. SDQ-nin fəaliyyəti ilə bağlı “bəzi yerlərdə möhkəmləndirmə aparırlar. Amma əvvəlki kimi ola bilməsi bir az çətindir” dəyərləndirməsi edilir və bunun səbəbi kimi də indiki Dəməşq hökumətinin mövqeyi göstərilir.
Bu arada Türkiyə Daxili İşlər naziri Ali Yerlikaya Suriyaya könüllü qayıdışların son vəziyyəti barədə məlumat verib. O, sosial şəbəkə hesabından paylaşımında bildirib.
“Türkiyə dünən olduğu kimi bu gün də könüllü geri dönüş prosesində suriyalı qardaşlarımızın yanındadır. 8 dekabr 2024-dən sonra Suriyada baş verən hadisələrin ardından könüllü qayıdışlar sürətləndi. Həmin tarixdən etibarən ümumilikdə 474 min 18 suriyalı qardaşımız ölkələrinə qayıdıb. 2016-cı ildən bu yana isə könüllü dönənlərin sayı 1 milyon 213 min 620 nəfərə çatıb. Ölkəmiz miqrasiya idarəçiliyini cənab Prezident Rəcəb Tayyib Ərdoğanın rəhbərliyi ilə aparır; tarixi təcrübəsi, humanist yanaşması və rasional baxışı ilə dünyaya nümunə model təqdim edir. Suriyalı qardaşlarımızın könüllü dönüş prosesləri Miqrasiya İdarəmizin koordinasiyası ilə böyük həssaslıqla davam etdirilir”.-deyə o bildirib.