BAKI, AzerVoice Analitik Təhlil Mərkəzi

İsrailin işğal olunmuş İordan çayının qərb sahilində yeni məskunlaşma planına beynəlxalq etiraz böyüyür. Böyük Britaniya və Fransa da daxil olmaqla 21 ölkə birgə bəyanat yayaraq, layihəni “qanunsuz” və “beynəlxalq hüquqa zidd” adlandırıb.

Fransa, Böyük Britaniya, Kanada, İspaniya və İtaliyanın da daxil olduğu dövlətlər İsrailin qərarını kəskin şəkildə pisləyib və onun dərhal ləğvini tələb edib. Avropa İttifaqının xarici siyasət rəhbəri Kaya Kallas da sənədə imza ataraq, bu addımın “Yaxın Şərqdə təhlükəsizlik və sabitliyə təhdid” olduğunu bildirib.

Fransa XİN-in bəyanatında qeyd olunub ki, İsrailin Şərqi Qüds yaxınlığında, “E1” adlı bölgədə 3400 məskunlaşma vahidi inşa etmək planı “qəbuledilməzdir” və beynəlxalq hüququn pozulması deməkdir.

Londonda İsrailin səfiri ölkə XİN-ə çağırılıb. Böyük Britaniya hökuməti məskunlaşma planını “açıq qanun pozuntusu” kimi qiymətləndirərək, bunun “iki dövlətli həll” perspektivini məhv edəcəyini vurğulayıb.

BMT də məsələ ilə bağlı narahatlığını ifadə edib. “Biz heç vaxt iki dövlətli həll yolundan bu qədər uzaq olmamışdıq,” – deyə BMT-nin Fələstinli Qaçqınlara Yardım Agentliyinin rəhbəri Filip Lazarini bildirib. Onun sözlərinə görə, İsrailin qərarı gələcəkdə fələstin dövlətinin yaradılmasını daha da mümkünsüz edəcək.

Yeni məskunlaşma layihəsi İordan çayının qərb sahilini şimal və cənub hissələrinə ayıraraq, gələcəkdə fələstin dövlətinin ərazi bütövlüyünü mümkünsüz hala gətirəcək. Hazırda Şərqi Qüdsdə təxminən üç milyon fələstinli, həmçinin 500 mindən çox israilli yaşayır.

İsraildə istənilən hökumət dövründə məskunlaşma siyasəti davam etdirilsə də, hazırkı hökumət dövründə bu proses daha da sürətlənib. Xüsusilə də 2023-cü ilin 7 oktyabrında “Həmas”ın hücumundan sonra Qəzzada başlanan müharibə fonunda məskunlaşmaların genişləndirilməsi daha da intensivləşib.