BAKI,VOA Orxan Qədirzadə

Türkiyədə “yeni nəsil” cinayət şəbəkələrinə qarşı mübarizəyə Terrorla Mübarizə (TEM) bölmələrinin də cəlb edilməsi qərara alınıb.

Daxili işlər naziri Mustafa Çiftçi bildirib ki, bu qruplar klassik mafiya və mütəşəkkil cinayət strukturlarından fərqli üsullarla fəaliyyət göstərir. Onların sabit məkanı, ənənəvi hiyerarşiyası və daimi heyəti olmaya bilər.

Çiftçinin sözlərinə görə, yeni cinayət şəbəkələri sosial media və internet vasitəsilə əlaqə qurur, xüsusilə uşaqları və gəncləri öz sıralarına cəlb etməyə çalışır. Bu qruplar kiberdələduzluq, narkotik ticarəti, hədə-qorxu, reket, silahlı hücum və digər cinayətlərlə məşğul ola bilirlər.

Nazir qeyd edib ki, şəbəkə rəhbərlərinin bir hissəsi xaricdə yerləşir. Türkiyədə cinayət törədərək ölkədən qaçan şəxslərlə yanaşı, xaricdən Türkiyədəki qruplara göstəriş verən şəxslər də izlənilir.

Çiftçi həmçinin sosial mediada fəaliyyət göstərən cinayət şəbəkələrinin izlənilməsində süni intellekt əsaslı açıq mənbə analizlərindən istifadə edildiyini açıqlayıb.