BAKI,VOA, Fərid Mikayılov

NATO-nun Ankarada keçirilən Zirvə toplantısı çərçivəsində həyata keçirilən təhlükəsizlik tədbirləri zamanı müxtəlif cinayətlərə görə axtarışda olan 4 412 nəfər saxlanılıb.

VOA xəbər verir ki, bu barədə Türkiyənin daxili işlər naziri Mustafa Çiftçi bildirib.

Nazirin sözlərinə görə, Ankara sammiti həm diplomatik, həm də təhlükəsizlik baxımından böyük əhəmiyyət daşıyıb və tədbirdə 41 ölkədən dövlət və hökumət başçıları iştirak ediblər.

Mustafa Çiftçi qeyd edib ki, sammitin təhlükəsizliyinin təmin olunmasına ümumilikdə 56 min polis və jandarma əməkdaşı cəlb edilib. Hazırlıq işlərinə aylar əvvəl başlanılıb, Ankara və ətraf vilayətlər üzrə xüsusi təhlükəsizlik planı hazırlanıb.

Onun sözlərinə görə, kibertəhlükəsizlik və terrorla mübarizə bölmələri sammitdən bir ay əvvəl fəaliyyətə başlayıb, son 72 saat ərzində isə təhlükəsizlik tədbirləri ən yüksək səviyyəyə çatdırılıb.

Nazir bildirib ki, paytaxt Ankarada dövlət qurumlarının əməkdaşlarına inzibati məzuniyyət verilib ki, şəhərdə nəqliyyatın sıxlığı azalsın.

"Şükürlər olsun ki, sammit heç bir ciddi insident olmadan başa çatdı. Ankara sakinlərinə göstərdikləri anlayış və dəstəyə görə təşəkkür edirəm", – deyə Mustafa Çiftçi vurğulayıb.