BAKI,VOA, Nailə Babazadə

Türkiyə Daxili işlər naziri Mustafa Çiftçi İstanbulun Beşiktaş rayonundakı polis məntəqəsinə edilən terror hücumu ilə bağlı aparılan istintaq çərçivəsində hücum edənlərlə əlaqəli olduğu düşünülən daha 2 nəfərin saxlanıldığını açıqlayıb.

VOA xəbər verir ki, nazir Mustafa Çiftçi "NSosyal" hesabından etdiyi paylaşımda Beşiktaşdakı "Yapı Kredi Plaza" blokları qarşısında xidmət edən polislərə qarşı törədilən mənfur hücumla bağlı araşdırmaların müvafiq qurumlar tərəfindən çoxşaxəli və titizliklə davam etdirildiyini bildirib. "İstintaq çərçivəsində hücumu həyata keçirən şəxslərlə əlaqəli olduğu ehtimal edilən daha 2 nəfər yaxalanıb" deyən Çiftçi, hadisənin bütün detalları ilə aydınlaşdırılması üçün işlərin qətiyyətlə davam etdiyini vurğulayıb.

Çiftçi təhlükəsizlik qüvvələrinin dərhal və təsirli müdaxiləsi nəticəsində hücumu həyata keçirən 3 nəfərin zərərsizləşdirildiyini qeyd edib: "Atışma zamanı yüngül yaralanan 2 qəhrəman polisimizin əməliyyatları uğurla tamamlanıb. Onların həyati təhlükəsinin olmaması ən böyük təsəllimizdir. Bu alçaq hücumun arxa planı, icraçıların əlaqələri və bağlı olduqları strukturlar dövlətimizin bütün imkanları istifadə edilərək ətraflı şəkildə araşdırılır".

Nazir Türkiyə Respublikasının ictimai asayişə və millətin hüzuruna yönəlmiş heç bir təhdidə dözüm nümayiş etdirməyəcəyini vurğulayaraq bildirib: "Türkiyənin hüzurunu hədəf alan heç bir struktur, heç bir mərkəz, heç bir podratçı öz məqsədinə çata bilməyəcək. Dövlətimiz millətimizin hüzuru üçün mübarizəsini qətiyyətlə davam etdirəcək".