BAKI,VOA, Fərid Mikayılov

İran Xarici İşlər Nazirliyi Fransa və bir sıra Qərb ölkələrinin insan hüquqları məsələsi ilə bağlı İrana qarşı birgə bəyanat yaymasını tənqid edib və bunu məsuliyyətdən yayınmaq cəhdi kimi qiymətləndirib.

VOA xəbər verir ki, İran Xarici İşlər Nazirliyinin İnsan Hüquqları Departamentinin rəhbəri vəzifəsini icra edən Həmid Əhmədi Fransa və digər Qərb ölkələrinin bəyanatını “riyakar yanaşma” adlandırıb.

Əhmədi bildirib ki, sözügedən ölkələr özlərinin Afrika, Qərbi Asiya və digər regionlarda insan hüquqları və beynəlxalq humanitar hüququn pozulmasındakı roluna görə məsuliyyətdən yayınmağa çalışırlar.

İran rəsmisi Fransanın müstəmləkəçilik tarixini xatırladaraq, Parisə digər ölkələrə insan hüquqları ilə bağlı dərs vermək əvəzinə, xarici vətəndaşlara və miqrantlara münasibətdə ayrı-seçkilik siyasətinə yenidən baxmağı tövsiyə edib.

O, həmçinin Fransanı və digər Qərb ölkələrini İsrailə hərbi və siyasi dəstəyi dayandırmağa çağırıb.

Əhmədi bildirib ki, İran xalqı ABŞ və İsrailin İrana qarşı hərbi əməliyyatları zamanı Fransa, Avropa İttifaqı və digər bəyanat müəlliflərinin mövqeyini unutmayıb.

İran rəsmisi Minab şəhərində məktəbə endirilən zərbə nəticəsində 168 mülki şəxsin öldüyünü iddia edib və Qərb ölkələrinin bu hadisələrə münasibətini tənqid edib.

Əhmədi Fransa, Avropa İttifaqı və digər imzaçıların İsrailin Fələstin, Livan, Suriya, Yəmən və İrana qarşı siyasətinə münasibətini də tənqid edərək, onların İsrailə müxtəlif formalarda dəstək verməklə bölgədə törədilən cinayətlərə görə məsuliyyət daşıdığını iddia edib.

İran Xarici İşlər Nazirliyinin nümayəndəsi ölkəsində cinayət törətməkdə təqsirləndirilən şəxslərin məhkəmə və cəzalandırılmasının qanunvericiliyə və ədalətli məhkəmə prinsiplərinə uyğun həyata keçirildiyini bildirib.

Əhmədi Fransa və Avropa İttifaqının İranın daxili işlərinə və məhkəmə proseslərinə müdaxilə etmək hüququnun olmadığını vurğulayıb.